Quarta, Fevereiro 19, 2025

Iha vizita Sua Santidade Papa Francisco mai iha Timor-Leste, husik hela mensajen katak povu Timor-Leste, atu moris fiar, haksolok tenke liuhusi lalaok oin tolu mak armonia, diálogu, no kultura.

Iha vizita Sua Santidade Papa Francisco mai iha Timor-Leste, husik hela mensajen katak povu Timor-Leste, atu moris fiar, haksolok tenke liuhusi lalaok oin tolu mak armonia, diálogu, no kultura.

Sua Santidade hato'o liuhusi hakerek iha livru Onra nian bainhira hala'o sorumutu ho Prezidente Repúblika Timor-Leste Dr. Jose Ramos Horta iha Palásiu Prezidensiál Nicolau Lobato Aitarak Laran,Díli.

Iha nia mensajen ne'e dehan, agradese tebes ba Na'i, tanba bele lori ona Nia (Sua Santidade Papa Fracisco) mai vizita Timor-Leste.

"Ha’u enkoraja povu, atu moris haksolok, fiar, ba Na'i liuhusi hahalok oin tolu hanesan, armonia, diálogu no kultura," Sua Santidade Papa Francisco hatete liuhusi nia mensajen iha Palásiu Prezidensiál Ai-Tarak Laran Díli.

Nia dehan, buat ne’ebé furak liu iha Timor-Leste mak ninia ema sira.

"Ha’u haraik bensaun ba ita-boot sira ho ha’u-nia fuan tomak," nia informa liuhusi Nia mensajen.

Iha parte seluk Sarani Katólika Luis Ximenes husi Munisípiu Manatuto dehan, vizita Sua Santidade nian, marka istória ida ba sarani katólika iha rai Timor-Leste.

"La’ós Sarani Katólika de’it, maibé povu Timor-Leste tomak, entusiasmu tebes hodi simu Sua Santidade," nia hatete.

Nia dehan, vizita Sua Santidade Papa Francisco mai ne'e bele lori bensaun, paz, nomós unidade ba rai Timor-Leste, tanba mensajen Amu Papa nian integra ba prosesu dezenvolvimentu tomak.