- Publika iha: 16 Setembro 2024
Reprezentante Prezidenti Autoridade Munisípiu Viqueque Luis Antonio da S. Soares husu ba Ministériu Obras Públiku, atu normaliza lalais Ponte Welolo ne'ebé lokaliza iha Suku Luca, Postu Administrativu Viqueque, Munisípiu Viqueque, tanba aat durante tinan barak ona.
Nia dehan, PAM Viqueque komunika ona ba iha nasionál atu haree ba problema ne'ebé komunidade iha suku Luka enfrenta hela, atu nune’e bele normaliza lalais ponte Welolo ne'e, se lae mak bainhira udan boot difikulta komunidade sira.
"Ita halo ona kontatu ba iha nasionál atu oinsá sira bele tun mai hodi haree atu bele normaliza lalais ponte ne'e, tanba ita-nia komunidade uma-kain lubuk ida mak hela iha fatin ne'e, tanba ne’e husu para Governu liuliu Ministériu Obras Públiku atu tau atensaun ba ponte," nia dehan hafoin remata enkontru preparasaun vizita amu Papa iha salaun Sekretariadu Komisaun Altu Nivel Instituisional, Motael, Díli.
Nia esplika, Ponte Welolo ne'e aat kleur tiha ona, mota liu fali husi estrada kuaze kilómetru ida ho balun hanesan ne'e, entaun bainhira udan boot mota tun, komunidade sira ne'ebé hela besik tenke sai husi sira uma, tanba mota tama.
"Komunidade sira iha ne'ebá ne'e la'ós hela besik mota, sira hela dook kuaze kilómetru ida ho balun hanesan ne'e, maibé mota Welolo ne'e tama hotu no liuhusi tiha estrada la'ós liuhusi mota dalan tuan ne'e, entaun komunidade sira balun husik tiha ona sira-nia uma, tama mota halo tiha dalan husi ne'ebá," nia haktuir.
Iha fatin seluk, komunidade suku Luka aldeia Uma-Boot Antonio Pinto hateten, durante ne’e sira hetan ameasa boot husi mota Welolo, tanba ne’e husu ba governu atu normaliza lalais ponte ne’e.
“Ami uma-kain hirak ne’ebé hela iha ne’e sente ta'uk tebes, bainhira tempu udan, ami tenke buka fatin sai, tanba mota tama ami-nia uma nakonu hotu,” nia dehan.
Nia hatutan, komunidade sira helaárea refere balun sai ona husi sira-nia fatin, tanba mota tama estraga hotu sira-nia uma, komunidade sira balun mak seidauk sai, tanba mota tama maibé la estraga buat ida.
“Ami hela iha ne’e uma-kain sanulu resin hitu, maibé balun sai ona, tanba uma mota estraga hotu, komunidade sira balun mak la sai tanba uma iha rai laletek, entaun mota tama duni maibé la estraga sira-nia uma,” nia dehan.