Quarta, Fevereiro 19, 2025

Diretór Servisu Saúde Munisípiu (SSM)-Ainaro, dr. Benedito Mendonça dos Santos hatete, Sentru Saúde Munisípiu Ainaro rejistu stock out ai-moruk hamutuk iten tolu-nulu-resin-rua (32).

Diretór Servisu Saúde Munisípiu (SSM)-Ainaro, dr. Benedito Mendonça dos Santos hatete, Sentru Saúde Munisípiu Ainaro rejistu stock out ai-moruk hamutuk iten tolu-nulu-resin-rua (32).

Nia dehan, stock out ai-moruk iten tolunulu resin rua, ne'e mak ho kategoria hanesan nesesáriu, vitál no esensiál.

"Iha Sentru Saúde Munisípiu Ainaro stockout Ai-moruk iten tolunulu resin rua (32) husi totál iten ne’e, ai-moruk sira ne'ebé stock out ne'e mak nesesariu iten hitu, vitál iten neen no esensiál iha iten sanulu-resin-sia," nia hateten liuhusi via-telefone.

Nia hatutan, ai-moruk menus ona, tanba ne'e komesa prepara ona lista hodi rejistu ai-moruk sira ne'e, atu nune’e bele haruka ba nasionál atu prepara ai-moruk haruka fali mai.

"Ita sempre uza maneira oioin hodi troka ai-moruk sira ne'ebé la iha ona, bainhira ai-moruk ida la iha ita uza fali ai-moruk seluk hodi troka, oinsá mak ami maneja ai-moruk sira atu labele fó impaktu ba pasiente sira-nia saúde.

Maneira ne’ebé iha mak hanesan ai-moruk esensiál nian, bee ne'ebé mak kahur ho ai-moruk hodi sona pasiente sira, ida-ne'e mak la iha, ami uza fali soru-been hodi kahur fali ai-moruk hodi sona fali pasiente sira, tanba ita nia ai-moruk hotu ona," nia esplika.

Iha sorin seluk reprezentante Prezidenti Autoridade Munisípiu Ainaro Ruivo Barros Magno hateten, foin lalais Parlamentu Nasionál liuhusi komisaun (F) ne'ebé trata asuntu Saúde halo fiskalizasaun hodi haree direita servisu saúde munisípiu Ainaro nian nomós haree mós problema stock out ai-moruk.

"Husi fiskalizasaun ne'e Parlamentu Nasionál liuhusi komisaun (F) ne'ebé trata asuntu Saúde dehan, Munisipiu Ainaro la enfrenta problema barak, mai husu para atu rezolve tiha lai problema stock out ai-moruk iten hira ne'ebé la iha ne'e, " nia dehan.

Nia haktuir, bainhira ai-moruk la iha pesoal saúde sira buka alternativu oioin atubele atende pasiente sira ne’ebé halo tratamentu iha sentru saúde no postu saúde sira, entaun husu responsavel sira atu bele rezolve tiha problema stock out ai-moruk.