- Publika iha: 16 Setembro 2024
Família uma-kain hamutuk 235 iha suku Macalaco, Postu Administrativu Quelicai, Munisípiu Baucau durante ne'e seidauk asesu ba eletridade.

Xefe suku Macalaco Estevão Salomão Matins Belo dehan, Timor-Leste ukunan tinan 24 ona, maibé komunidade iha suku refere sei nafatin enfrenta problema la asesu ba eletrisidade.
"Durante ne'e ita-nia família iha uma-kain hamutuk 235 iha suku Macalaco mak seidauk asesu ba eletridade," nia hatete.
Nia informa, iha tempu kalan komunidade sira utiliza de’it lampu tradisional no balun ne’ebé iha osan sira sosa tenagga suria (solar panel) hodi utiliza ba tempu kalan.
"Iha suku Macalaco iha Aldeia tolu no komunidade sira ne'ebé mak hela iha mota sorin la asesu ba eletridade," Xefe Suku Macalaco Belo dehan.
Nia dehan, nu’udar líder suku, husu governu tau matan netik ba komunidade sira iha suku Macalaco, Postu Administrativu Quelicai, Munisípiu Baucau liu-liu rezolve problema eletridade no estrada hodi fasilita komunidade sira sente naroman iha tempu kalan nune’e mós problema estrada atu bele fasilita komunidade sira bele lori sira produtu ba merkadu.
Entretantu Ministru Obras Públika (MOP) Samuel Marçal dehan, programa prioridade IX Governu liuliu MOP nian, primeiru mak eletrisidade no estrada ba komunidade sira iha territóriu laran.
"Eletrisidade ne'e ita la aselera iha tinan ida-ne'e, maibé ita sei esforsu, tanba tuir planu tenke finalize instalasaun iha tinan 5 nia laran," nia dehan.
Nia hatutan, dadaun nee ekipa halo hela identifikasaun ba área hirak ne’ebé mak seidauk asesu ba eletrisidade no depois aprezenta atu nune'e bele tau iha planu no hahú rezolve iha orsamentu 2024 nian.