SSM-Viqueque Rejistu Moras Ispa Ba Idade Tinan 1-4 Hamutuk 2388

Iha fulan Janeiru to'o fulan Marsu Servisu Saúde Munisípiu Viqueque (SSM-Viqueque) konsege rejistu kazu moras Infesaun Respiratóriu grave ba labarik tinan ida (1) to'o tinan haat (4) hamutuk rihun rua atus tolu ualu nulu resin ualu (2388).

Diretór Servisu Munisípiu Viqueque dr. Aljaksono Soares Maia hateten, moras Infesaun Respiratóriu hanesan moras ki'ik ida ne'ebé ataka sistema respiratóriu, moras ne'e akontese tuir klima no moras ne'e afeta liuba área órgaun respiratóriu hanesan pulmaun.

"Ita agora iha klima ida ne'ebé udan, anin, rai rahun, tanba ne'e moras ISPA ne'e mak aas liu, tuir dadus ne'ebé iha moras ISPA afeta ba labarik tinan 1-4 mós barak, tanba impaktu mai husi klima ne'e, " nia dehan liuhusi via-telefone.

Nia esplika, atu prevene oan sira husi moras Infesaun Respiratóriu ne'e mak presiza kuidadu oan sira atu labele konsumu hahán ne'ebé fo'er, molok atu han tenke fase liman, labele husi labarik sira han mesak, bainhira atu sai ba fatin ruma di'ak liu uza maskra, atu nune’e bele prevene an husi rai rahun, no seluk tan, tanba tempu agora ne'e udan, anin no rai rahun.

Iha parte seluk, reprezentante Prezidenti Autoridade Munisípiu Viqueque Luis Antonio da S. Soares hateten, agora ne'e tempu moras duni, tanba ne'e presiza kuidadu an husi moras sira-ne’e, liuliu labarik ki'ik sira, tanba sira moras ne'e difikulta tebes inan-aman, tanba ne'e di'ak liu mak kuidadu an.

"Moras ida-ne'e la'ós kona labarik sira de'it, ita boot mós moras mak ida-ne'e, isin manas, me'ar, inus metin, ulun moras, ida-ne’e ema dehan moras baibain ema boot mós enfrenta hela, moras ne'e kona ita tanba, ita haree ba ita-nia klima ne'e dala ruma udan, anin no dala ruma bain loron, entaun liuhusi klima ne'e lori moras mai ita," nia dehan.

Nia hatutan, di'ak liu mak kuidadu an, atu moras ne'e labele kona, inan-aman sira tenke kuidadu oan sira, bainhira oan sira atu han tenke fase tiha liman, labele husik oan sira mak han mesak, bainhira sai ba li'ur tenke hatais tiha faru labele husik isin tanan de'it mak sai ba li'ur, ida-ne'e la di'ak.