Okupa Espasu Públiku Tenke Hetan Autorizasaun Husi Polísia

Komandante Tránzitu Seguransa Rodaviariu Nasionál Superintendente Asistente Luis da Costa dehan, ba komunidade sira ne’ebé mak atu okupa espasu públiku hanesan estrada hodi halo tenda ba atividade importante sira tenke hetan autorizasaun husi polísia.

Nia dehan, bainhira komunidade sira atu utiliza estrada públiku hodi halo tenda ba sira-nia atividade importante, tenke husu autorizasaun husi polísia nune'e bele livre husi sansaun.

"Maské ita nia lei kódigu estrada númeru 6/2003 bandu,maibé atu uza ba atividade importante tenke husu autorizasaun ba polísia, atu nune'e ita bele tun ba fó seguransa nune’e labele mosu engrafamentu," nia dehan.

Nia dehen, bainhira komunidade halo de’it tenda la iha autorizasaun husu polísia, ne’e polísia sei aplika sansaun multa tuir Lei Kódigu Estrada nian.

"Antes ne'e ita halo ona atuasaun ba komunidade balun ne’ebé mak halo tenda iha estrada públiku, tanba la iha autorizasaun," Komandante Tránzitu Seguransa Rodaviariu Nasionál Superintendente Asistente Costa dehan.

Alende ne'e nia dehan, la’ós de’it ba halo tenda,maibé ba mos sira ne’ebé mak sosa tiha karreta, maibé fatin para la iha no karreta aat sira ne’ebé mak para okupa espasu públiku ne'e.

Entretante Xefe Suku Motael, Jose Alves Lopes hateten, iha nia suku laran seidauk haree iha komunidade halo festa kazamentu ruma loke tenda iha dalan públiku, maibé lia-mate ruma, sira halo tenda iha dalan públiku ba sira ne’ebé hela besik estrada.

“Kazamentu ne’e sira ba aluga gedung sira no ba lia-mate, sira husu uluk ha’u nu’udar xefe suku, ha’u fó autorizasaun mak foin sira halo tenda iha dalan públiku, durante loron 4 ka 5 de’it, labele liu ida-ne’e,” nia hateten.

Maibé nia dehan, antes komunidade sira halo tenda mós sira husu uluk ona autorizasaun ba autoridade suku no polísia mak sira foin halo tenda.