- Publika iha: 13 Setembro 2024
Diretór Servisu Saúde Munisípiu Viqueque (SSM) Dr. Aljaksono Soares Maia hateten, Sentru Saúde Munisípiu Viqueque rejistu ai-moruk stock out hamutuk item ruanulu resin neen (26).
Nia dehan, iha fulan janeiru ne'e nia laran Saúde Munisípiu Viqueque rejistu ona ai-moruk esensiál, vitál no nesesáriu hamutuk iten 26.
"Ita iha ai-moruk esensiál, vitál no nesesáriu item 26 mak hanesan Amoxillin, ampicillin, multivitamin, salbutamol, tramodol, vitamin B6, Vitamin K1, acylovir, azithomicin, cloxacillin, diazepam no seluk tan, ai-moruk sira ne'e mak agora la iha," nia dehan liuhusi via-telefone.
Nia dehan, ai-moruk esensiál, vitál no nesesáriu ne'ebé uza hodi halo atendimentu ba moras babain sira komesa menus ona, tanba ne'e pesoal saúde komesa prepara ona lista hodi haruka ba iha Nasionál, atu bele rezolve lalais problema stock out ba ai-moruk ne'e.
Iha parte seluk reprezentante Prezidenti Autoridade Munisípiu Viqueque Luis Antonio da S. Soares hateten, PAM Viqueque kontatu ona ba Diretór Saúde Munisípiu Viqueque nian, no oinsa atu bele rezolve preblema ne'ebé parte saúde enfrenta.
"Prezidenti Autoridade Munisípiu Viqueque halo ona kontatu ba Diretór Saúde Munisípiu Viqueque atu rejistu ai-moruk stock out hamutuk item hira, atu nune’e bele kontatu ba nasionál atu oinsa halo preparasaun ai-moruk haruka mai, atu bele distribui ba sentru saúde no postu saúde sira hotu hodi labele difikulta ba tratamentu," nia dehan.
Nia dehan, probelma ai-moruk ne'e probelma nasionál, tanba ne'e karik menus ona tenke haruka kedas lista ba nasionál atu bele prepara ai-moruk, selae ema ruma moras mak tama ospital ai-moruk la iha oinsa, atu haruka sira hola rasik, ida-ne'e labele, tanba ne'e husu atu tau atensaun ba ai-moruk sira-ne'e.