- Publika iha: 15 Agosto 2024
Prezidente Institutu Nasional Combate HIV-SIDA (INCSIDA, IP), Daniel Marçal hateten, katak liu husi sensibilizasaun atu hasa’e ema nia konhesimimentu bele hamenus Human Immunodeficiency Virus (HIV) no Síndrome da Imunodeficiência Adquirida (SIDA) iha Timor-Leste.
“Sensibilizasaun ne’e ho objetivu ida katak oinsá atu bele muda ema ida nia konsiénsia husi aat ba di'ak, tanba ne’e liuhusi sensibilizasaun ne’e ita fiar katak, ita bele muda joven balun nia konsiénsia,” nia dehan iha Salaun INCSIDA, I.P Pantai Kelapa Díli.
Nia hatutan, atu garante duni katak moras refere bele menus, presiza organiza joven sira hodi fó formasaun ba sira, maibe presiza kontribuisaun husi parte hotu nian, atu oinsá bele dada jovem sira ne’e bele hakbesik rona informasaun ne’ebé fahe.
Nia salienta, ema sira ne’ebé durante ne’e afeta hela ba moras ne’e, maibé la ba halo tratamentu, entaun liuhusi sensibilizasaun ne’e bele fó hanoin ba sira atu bele ba halo tratamentu, moras ne’e sériu, maibé ho prevensaun di’ak no tratamentu apropriadu, ema sira ne’ebé hetan HIV bele prevene. Importante iha konsiénsia no edukasaun komunitária kona-ba moras ne’e no halo prevensaun atu nune’e Timor-Leste nafatin iha komunidade ne’ebé forte no saudável.
Iha fatin hanesan, Diretor Servisu Saude Munisípiu Díli, Mateus Pinto hateten, sensibilizasaun ne’e importante, tanba atu prevensaun ba HIV-SIDA ne’e la fasil, tanba ne’e liuhusi sensibilizasaun atu nune’e bele muda joven sira-nia komportamentu.
“Timor-Leste hanesan nasaun foun ida, tanba ne’e liuhusi sensibilizasaun hanesan ne’e bele muda joven sira-nia hanoin atu labele kona moras ne’e, tanba ita hotu hatene katak moras HIV-SIDA ne’e, susar atu halo prevensaun, entaun ita tenke halo sensibilizasaun atu nune’e bele hasa'e koñesimentu joven sira-nian,” nia dehan
Nia salienta, prevensaun ba moras HIV-SIDA iha Timor-Leste bele envolve estratéjia oioin, ne’ebé fokus ba edukasaun, asesu ba servisu saúde atu muda atitude no komportamentu komunidade liu-husi sensibilizasaun.
‘Sensibilizasaun ida-ne’e importante, nomós fó hanoin ba ema sira-ne’e ho HIV tenke hetan asesu ba ART nian, tanba liu husi tratamentu ne'e bele ajuda fó kualidade moris di'ak liu. Atu hetan ART di'ak presiza servisu saúde tenke presta informasaun klaru kona-ba oinsá atu halo tratamentu ba moras HIV-SIDA hodi motiva ema atu ba halo tratamentu,” nia dehan.
Nia informa, ema ho HIV tenke hetan suporta psikolójiku no sosiál atu labele mosu estigma no diskriminasaun, tenke suporta sira hodi halo tratamentu ba saúde no tenke kontinua halo kampaña nasionál atu aumenta konsientizasaun públika no prevensaun ba HIV. Kampaña ne'e bele envolve governu, NGO sira, no parte relevante sira seluk.