- Publika iha: 15 Agosto 2024
Governu liuhusi Ministériu Ensinu Supérior Siénsia no Kultura (MESSK) haruka jurista Timoroan nain-hitunulu (70) ba hala'o estudu iha Portugal no fila mai hodi apoiu ba reforma justisa iha rai-laran.
Ministru MESSK, Jose Honório Jerónimo, dehan jurista na’in-70 ne’ebé mak ba hala'o estudu iha Portugal ne'e liuhusi selesaun husi vaga bolsu estudu nian.
Nia dehan, Timoroan na’in-70 ne'e selesionadu husi lian Portugues, tanba sira iha koñesimentu di’ak ba língua Portuges liuhusi rona, hakerek, lee, no ko’alia iha portugues jurídiku nian.
"Ita haruka jurista na’in-70 ne'e ba hala'o estudu iha Portugal kona-ba área jurídiku no fila mai hodi apoiu reforsa reforma justisa iha rai-laran," MESSK Jeronimo hatete.
Nia hatete, sira-nain hirak ne’e ba hala'o estudu iha nivel mestradu nian durante tinan 2 mak sei fila mai mai Timor-Leste.
Enkuantu nia dehan, dadaun ne'e MESSK koopera hamutuk ho Fundu Dezenvolvimentu Kapital Humanu (FDCH) loke tan bolsu estudu ba Timoroan hamutuk nain 10 hodi ba hala'o estudu iha Malázia.
Entretantu, Bolseriu Elizio Verdial dehan pasa iha bolsa estudu ne'e hanesan grasa ida, tanba ne'e nia sei esforsu an hodi estuda no hatudu komportamentu di’ak, bainhira estudu remata fila mai hodi reforma justisa iha Timor-Leste.
"Ami sei aproveita oportunidade ne'e ho dia’k hodi hala'o ami nia estudu no sei kumpri regulamentu hotu ne’ebé mak ami asina ona," nia salienta.
Enkuantu nia dehan, finaliza nia estudu lisensiatura iha área Direitu iha Universidade da Paz Iha tinan 2023 foin lalais.