Asu Sanulu Resin Sia (19) Iha RAEOA Pozitivu ba Moras Rabies

Veterináriu iha Rejiaun Administrativa Espesiál Oé-cusse Ambeno (RAEOA), Dotór Brito de Araujo hateten ekipa veterináriu RAEOA durante ne’e halo ona identifikasaun ba asu hamutuk sanulu resin sia (19) mak pozitivu ba moras rabies.

Nia dehan, asu 19 bele pozitivu ba moras rabies, tanba hetan tata husi asu seluk ne’ebé hetan ona moras rabies.

“Asu 19 ne’ebé identifika pozitivu ba moras rabies ne’e tanba, asu sira-ne’e tata ona ita-nia komunidade, entaun ami foti sampel hodi ba teste foin hatene katak, asu sira-ne’e pozitivu ba moras rabies,” nia dehan liuhusi telefone.

Nia salienta, asu sira ne’ebé pozitivu ba rabies tanba kontatu ho animál seluk ne'ebé iha tiha moras rabies.

Iha parte seluk, Sekretario Saúde Rejional Oé-Cusse, Luis de Jesus Neno, hateten asu sira refere, agora ekipa husi Ministériu Agrikultura, Pekuária Peska no Floresta (MAPPF) liuhusi departamentu veterináriu halo ona vasinasaun ba asu sira-ne’e.

“Husi veterináriu foti amostra (sampel) rezultadu hatudu katak, asu sira-ne’e pozitivu moras rabies, tanba ne’e mak komunidade ne’ebé mak hetan asu tata husi asu sira ne’ebé mak pozitivu, agora dadaun pesoál saúde sira monitoring beibeik, atu bele hetan tratamentu, nune’e bele prevene pasiente ne’e, atu labele mosu sintomas ruma ba nia,” nia dehan.

Nia salienta, bainhira foti amostra tenke hodi halo teste laboratóriu, no hein bainhira rezultadu teste laboratóriu iha ona hodi deside karik asu ne'e pozitivu ba rabies, maka presiza hetan izolamentu hodi prevene tranzmisaun ba asu seluk no mos ba ema.