FONGTL Husu Governu Rezolve Problema Ai-Moruk Ho Sériu

Forum Organizasaun Non Govermental Timor-Leste (FONGTL) husu governu liu-liu Ministériu Saúde (MS) atu rezolve lalais problema ai-moruk, tanba saúde ne'e direitu báziku ba sidadaun sira.

Diretór Ezekutivu FONGTIL, Valentim da Costa Pinto, dehan situasaun iha área saúde tenke mellora urjente hodi fasilita profisionál saúde sira bele hala'o sira nia knaar ho di’ak iha postu saúde no ospitál sira nune’e bele halo tratamentu ba komunidade.

Nia dehan, problema ai-moruk stok menus ne'e komesa fulan ida ona, maibé to'o agora governu seidauk rezolve.

"Ita husu ba governu liu-liu Ministériu Saúde atu rezolve problema ai moruk ho sériu, tanba saúde ne'e direitu báziku ba sidadaun sira hotu," nia salienta.

Nia dehan, Ministériu Saúde tenke halo intervensaun rápida, no tenke mellora, tanba ne’e asuntu nasionál no presiza rezolve lalais problema stok ai-moruk.

"Ita lakohi problema ne'e fó oportunidade ba ita-nia númeru mortalidade sae, tanba ne'e presiza mellora imediata,” dehan Diretór FONGTIL.

Entretantu, Ministra Ministério Saúde, Dra. Elia dos Reis Amaral rekoñese, loos katak iha irregularidade balun ne’ebé akontese iha MS hodi kontribui ba problema stoke out ai-moruk iha rai laran.

Nia dehan, dadaun ne'e ministériu buka hela mekanizmu hotu, hodi hadia distribuisaun ai-moruk husi Institutu Nasionál Farmasia no Produtu Médiku (INFPM) bá ospitál nasionál, ospitál referral, postu saúde no sentru saúde sira hotu, atu evita ai-moruk hotu ne’ebé sosa ho osan estadu tokon ba tokon maibé ikus liu prazu ka expire no tenke sunu item 275 ne’ebé sosa ho orsamentu Estadu ho valor aas.

"Ministériu Saúde sei esforsu hadia irregularidade hirak ne’ebé akontese iha área saúde durante ne’e. Ita rezolve ho silensiu hodi hadia mekanizmu hotu hodi halo atendimentu ne’ebé di’ak liuba povu iha área saúde," nia informa iha Palácio do Governo, Díli.

Enkuantu nia dehan, problema iha área saúde ne'e antes ona IX governu hahu, hanesan problema stock out ai-moruk ne’ebé governu anteriór nian husik hela, tanba ne’e governu ida ne’e mai atu hadia.