Quinta, Julho 18, 2024

Governu Australia apoiu governu Timor-Leste liuhusi Ministériu Interior (MI) hodi halo jestaun seguransa iha fronteira hodi kontrolu movimentu tama no sai teritório nasional tomak.

Governu Australia apoiu governu Timor-Leste liuhusi Ministériu Interior (MI) hodi halo jestaun seguransa iha fronteira hodi kontrolu movimentu tama no sai teritório nasional tomak.

"Liuhusi kooperasaun ne'e Governu Austrália apoiu Ministériu Interior liu-liu iha Diresaun Nasional Servisu Migrasaun hodi halo jestaun iha área seguransa iha fronteira hodi kontrola movimentu tama no sai husi fronteira," Ministru MI, Francisco da Costa Guterres, dehan.

Nia dehan, apoiu ne’ebé mak Governu Austrália halo ne'e hodi bele garante futuru ida ne’ebé pozitivu liuba Timor-Leste.

"Ha’u lori governu hato'o agradese ba Embaxada Austrália no grupu traballu sira, tanba apoiu reforsa seguransa iha fronteira no koperasaun ida-ne'e signifikante tebes atu hametin ita-nia parseria iha área servisu migrasaun no asuntu rejionál ne’ebé iha relasaun hodi haforsa jestaun fronteira," MI Guterres salienta.

Tanba ne'e nia dehan, Austrália no Timor-Leste la’ós de’it nasaun viziñu no belun ne’ebé besik, maibé Austrália mós nu'udar parseiru dezenvolvimentu no seguransa bo'ot liu iha Timor-Leste.

"Koperasaun kona-ba haforsa jestaun seguransa iha fronteira ne'e inkliu mós hodi kombate krime autór krime organizadu sira," nia informa.

Enkuantu nia dehan, antes ne’e Ministériu Interior mós asina ona MoU ho Polísia Federal Australia (AFP) liuhosi Timor-LLeste Police Develoment Program (TLPDP) ho objetivu atu bele ajuda Guvernu Timor-Leste servisu makas hodi kombate krime transnasionál hotu.

Iha fatin hanesan, Embaxadóra Australia iha Timor-Leste, Caitlin Wilson, hatete apoiu refere ba MI hanesan pasu importante ida hodi haree ba interese koletivu atu promove koperasaun ne’ebé di’ak hodi mellora kapasidade servisu haforsa di’ak liutan servisu iha Timor-Leste.

“Iha ne'e husi ami-nia parte hakarak halo de’it sumáriu ba área importante sira ne’ebé iha, liu-liu kona-ba koperasaun iha área seguransa nian. Ne’e atu kontinua promove área jestaun fronteira nian nomós deskute área importante seluk kona-ba seguransa fronteira nian, iha rejiaun ida ne’ebé sai interese komún liga ba jestaun imigrasaun no fronteira nian,” nia hatete.

Nia dehan, elementu prátika balun husi koperasaun ne'e nian maka sei foka liu iha área kapasitasaun no informasaun inklui área balun ne'ebé sei esplora kona-ba seguransa iha fronteira.