Quinta, Julho 18, 2024

Koordenadór Projetu Centros de Aprendizagem e Formação Eskolár (CAFE), Rogerio Soares, dehan implementasaun projetu CAFE ne’e, ho objetivu hodi reforsa kualidade ensinu iha Timor-Leste.

Koordenadór Projetu Centros de Aprendizagem e Formação Eskolár (CAFE), Rogerio Soares, dehan implementasaun projetu CAFE ne’e, ho objetivu hodi reforsa kualidade ensinu iha Timor-Leste.

Nia dehan, CAFE ne’e implementa ona iha munisípiu hotu iha Timor-Leste, nune’e bele apoiu ba reforsa kualidade ensinu husi nasionál to’o munisípiu.

“Ezisténsia Centros de Aprendizagem e Formação Eskolár (CAFE) ne’e hodi reforsa kualidade ensinu iha Timor-Leste, tanba Ministériu Edukasaun kontrata diretamente profesór sira husi Portugal mak mai hanorin. Aleinde hanorin estudante, sira mós fahe esperiénsia ba profesór Timoroan sira atu bele hadia sira-nia kualidade ensinu,” nia dehan.

Nia dehan, eskola CAFE ne’e estatutu eskola públiku no nia kurríkulu tuir kurríkulu nasionál, no nesesidade eskolár nian hotu kompostu husi konsensaun eskolár, merenda eskolár, infraestrutura eskolár mós husi Ministériu Edukasaun.

“Diferensa ho eskola publiku sira mak iha prosesu aprendizajen estudante no profesór sira hotu tenke hanorin ka koalia ho Língua Portguesa no hetan hanorin ne’ebé mak di’ak tebes husi profesórsira husi Portugal no rezultadu hatudu katak iha ezame final, CAFE sempre okupa valór bo’ot,” Koordenadór Soares dehan.

Enkuantu nia dehan, husi eskola CAFE sira ne’ebé mak instala iha teritóriu laran ne’e hahu husi pre-primaria to’o sekundária no funsiona normal tuir kurríkulu nasional no totál estudante hamutuk na’in 11.500.

Entretantu, Koordenadór Rede Edukasaun Timor-Leste Coalition For Educatio (TLCE) Jose Monteiro dehan, projetu CAFE ne’e liuhusi koperasaun Ministériu Edukasaun Portugal no Ministériu Edukasaun Timor-Leste.

“Projetu CAFE ne’e hodi reforsa ninia komponente formasaun nian ba profesór sira liu-husi formasaun komplementár, ho karakter sientifiku pedagójiku. Alende hanorin estudante sira, tulun mós professór nasional sira iha áreae dukativa, oinsa transforma siénsia ne’ebé mak di’ak ho kualidade ba estudante sira,” nia informa.

Maibé nia dehan, husu mós ba Ministériu Edukasaun atu bele tau mós prioridade ba eskola públiku sira seluk tanba, maioria povu nian ona hala’o estudu iha eskola públiku sira la’ós CAFE de’it.