Quinta, Julho 18, 2024

Partisipasaun feto Polísia Nasional Timor-Leste (PNTL) menus iha misaun ba apoiu paz ONU (Organização Nações Unidas) nian, tanba kestaun la domina língua.

Partisipasaun feto Polísia Nasional Timor-Leste (PNTL) menus iha misaun ba apoiu paz ONU.

Komandante Kooperasaun Relasaun Internasional, Superintendente Asistente Agusto Tilman, dehan durante ne'e feto PNTL partisipa iha misaun ONU apoiu paz ne'e menus liu kompara ho nasaun seluk.

"Ita-nia feto PNTL partisipa iha misaun apoiu paz ONU ne'e menus, kompara ho nasaun seluk, tanba ladun iha skill ba Língua Ingleza. Nune'e mós balun laen sira mak la hatan," nia salienta.

Nia dehan, kriteira ne’ebé atu partisipa iha misaun apoiu paz ONU ne'e mak tenke iha koñesimentu di’ak ba Língua Ingleza tanba ba hala'o servisu no apoiu paz ne'e konjuntu ho forsa polísia husi nasaun seluk.

"Durante ne'e feto ne’ebé membru PNTL ne'ebé mak partisipa iha misaun apoiu paz ONU nian, iha nain tolu (3) de’it. Husi nasaun seluk ne'e maioria feto," Komandante Tilman dehan.

Nia dehan, atu aumenta númeru feto PNTL partisipa iha misaun apoiu paz ONU dadaun ne'e komandu servisu hamutuk ho parseiru Internasional sira hanesan Timor-Leste Police Development Program (TLPDP) hodi fó formasaun Língua Ingleza ba membru polísia feto sira.

Nia dehan, durante ne'e membru PNTL ne'ebé partisipa iha misaun apoiu paz ONU iha nasaun Ruada, Afrika, no Sudaun do Sul, hamutuk na’in 17, kompostu husi feto 3 no mane 14.

Entretantu, Inspetór Xefe Maria Fatima Martins dehan, hanesan membru feto ne’ebé hetan oportunidade hodi partisipa iha misaun apoiu paz ONU nian iha Ruanda esperiénsia barak mak nia hetan no fila mai promove iha PNTL.

"Hau orgullu tebes, tanba bele reprezenta ha’u-nia feto maluk sira hodi partisipa iha misaun manutensaun paz ONU nian," nia salienta.

Nia dehan, atividade ne’ebé sira halo durante tinan 2 hala'o misaun apoiu paz ne'e mak halo apoiu humanitária ba vítima husi konflitu internasional nian, hanesan apoiu aihan, tratamentu saúde evakua sira ba fatin ne’ebé seguru no seluk tan.