Quinta, Julho 18, 2024

Atu hadook an husi moras hada'et husi relasaun seksuál, Institutu Nasional Kombate HIV-SIDA, Impreza Públiku (INCSIDA, IP) kontinua halo sensibilizasaun ba estudante Ensino Católica Sagrado Coração de Jesus (SACROJES), hodi hasa'e koñesimentu estudante sira-nian kona-ba moras hada’et HIV-SIDA.

Diretór ba Promosaun, Prevensaun no Komunikasaun INCSIDA, Silvestre da Costa Sarmento hateten, sensibilizasaun ne’e atu fó hanoin nafatin ba estudante sira iha SACROJES kona-ba oinsá atu prevene an husi moras hada'et husi relasaun seksuál.

Diretór ba Promosaun, Prevensaun no Komunikasaun INCSIDA, Silvestre da Costa Sarmento hateten, sensibilizasaun ne’e atu fó hanoin nafatin ba estudante sira iha SACROJES kona-ba oinsá atu prevene an husi moras hada'et husi relasaun seksuál.

“Ema barak seidauk rona informasaun kle'an kona-ba moras HIV-SIDA, tanba ne’e mak ema balun ne’ebé moris ho vida relasaun seksuál, ida ne’e mak fó impaktu ba sira-nia an no ba sosiedade, tanba ne’e mak númeru ne’e kontinua aumenta. Maibé ita kontinua halo sensibilizasaun ba komunidade sira nomós ba estudante sira, atu nune’e sira bele prevene an husi moras hada'et husi relasaun seksuál no moras seluk tan,” nia dehan iha eskola SACROGES Bekora, Díli.

Nia dehan, sensibilizasaun ne’e halo atu oinsá bele hasa'e estudante sira-nia koñesimentu, la'ós atu bandu sira labele halo relasaun seksuál, maibé fó hanoin ba sira oinsá atu halo reasaun seksuál loos no di'ak atu labele kona moras ne’e, no oinsá atu hadook an husi moras HIV.

Iha parte seluk, Diretór SACROJES, Pe. Hellio da Costa Nunes hateten, ema ida responsabilidade ba an rasik, la iha ema seluk mak responsabilidade ba fali ema seluk, tanba ne’e liuhusi sensibilizasaun ida ne’e bele hasa'e di'ak liu tan estudante sira-nia koñesimentu ba moras HIV/SIDA, tanba moras ida hada'et husi relasaun seksuál ne’e perigu tebes, tanba ne’e ema ida ida-idak tenke kuidadu an atu labele kona moras ne’e.

“Saúde ne’e iha ita-nia liman rasik ne’ebé responsabilidade boot ba ita-nia an ne’e uluk nanain iha ita ida-idak. Ita hotu rona katak moras ida-ne’e perigu tebes, tanba bainhira kona ona ita, ne’e durante ita-nia moris ne’e hemu de'it ai-moruk, katak ita-nia moris ne’e dependente ba de'it ai-moruk,” nia dehan.

Liuhusi sensibilizasaun ida ne’e, oinsá atu bele fahe informasaun ba estudante sira oinsá atu bele prevene an husi moras ne’e, atu nune’e labele monu ba perigu ba moras ida ne’e, tanba bainhira ema ida mak kona ona moras ne’e, la iha ai-moruk ida mak atu kura, ai-moruk ne’e só hodi prevene de'it, atu moras ne’e labele aumenta, maibé atu halo di'ak ne’e la iha.

Diretór ne’e mós husu atu esplika klaru moras ne’e ba estudante sira, atu nune’e sira bele komprende oinsá mak bele prevene an husi moras ne’e, labele esplika taka taka fali, tanba estudante sira iha ne’e mesak boot hotu ona, tanba ne’e tenke esplika klaru ba sira, atu nune’e estudante sira bele komprende.