PNTL kontinua halo operasaun iha kalan hodi kontrola situasaun hakmatek

Polísia Nasional Timor Leste (PNTL) nia Komandu Munisípiu Díli dadaun ne’e parte polísia kontinua halo opersaun kalan hodi antisipa no kontrola situasaun bele hakmatek atu komunidade bele livre halo movimentu ba atividade sira iha kapitál Díli.

"Dadaun ne'e ita nafatin halo operasaun kalan hodi kontrola no fó seguransa ba ita-nia komunidade hotu ne’ebé mak movimentu iha kapital Díli," Infora Komandante Polísia Munisípiu Díli, Superintendente Xefe Orlando Gomes.

Nia dehan, liuhusi atividade operasaun iha kalan foin lais, sira halo atuasaun ba joven nain 5 ne'ebé hemu lanu tiha mak halo cek poin iha estrada no utiliza safenda hodi sona vitima, bainhira fila husi servisu fatin ba uma iha área Manleuana.

Nia hatete, depois de akontesimentu ne'e, ekipa Servisu Nasional Intelijénsia (SNI) halo kedan operasaun hodi halo kapturasaun ba joven nain 5 ne'e hodi mai entrega iha komandu munisípiu Díli.

"Joven nain 5 ne'e ita submete ba sela 72 oras hodi halo prosesu investigasaun no kontinua prosesu ba Ministériu Públiku, tanba ne'e krime," Komandante Xefe Gomes hateten.

Nia dehan, joven nain lima ne'e ho inisial JX, JB, JS, JM Ho CN no kazu ne'e tenke prosesu kontinua, tanba sira komete krime tentativa omesidu, arma branka, no halo cek poin ilegal no ida-ne'e sei la tolera.

Komandante apela ba joven sira, karik hemu lanu hakmatek iha uma no labele la’o arbiru iha dalan publiku hodi halo cek poin ilegal iha dalan.

Entretantu, Xefe Aldeia Mane Mesak, Suku Manleuana, Rogerio do Rosario dehan, joven sira ikus ne'e prioridade liu ba problema no haluhan sira-nia futuru.

"Husu ba ita-nia joven sira, atu investe tempu ba eskola no estuda hodi labele mete problema atu halo terus inan-aman. Imi joventude mak futuru nasaun nian, tanba ne'e presiza investe tempu ba estudu hodi prepara futuru ne’ebé mak di’ak hodi halo inan-aman kontente," nia hateten.