MESSK Distribui Livru 60 Ba Ensinu Superiór Akreditadu Sira

Ministériu Ensinu Superiór Siénsia Kultura (MESSK) distribui livru kona-ba istória Atauro nian ho naran Rama Hana, hamutuk 60, ba Ensinu Supérior akreditadu hamutuk 16 iha Timor-Leste.

Diretora Geral MESSK, Filomena Lay, dehan livru Rama Hana ne'e hakerek kona-ba istória no kultura Ataúro nian ne’ebé mak dadaun ne'e atu lakon ona tanba ne'e liu husi livru ida ne'e bele fó hanoin fali jerasaun foun sira liu-liu estudante sira atu bele hatene no bele hatutan.

Nia dehan, konteúdu tomak iha livru ne'e hakerek kona-ba lala'ok moris komunidade Ataúro nian no lian materna tolu ne’ebé mak eziste iha Ataúro.

"Ita lakohi istória no kultura Ataúro nian atu lakon, tanba ne'e mak ita halo investigasaun hodi hakerek livru ne'e hodi fahe ba ensinu superiór sira, rai iha biblioteka atu estudante sira bele lee," DG Lay dehan.

Nia informa, livru ne’ebé mak sira distribui ba Ensinu Superiór Akreditadu sira hamutuk 60 no ba universidade hamutuk 16 kompostu husi instituisaun públika no privada sira.

Nia dehan, livru ne'e hakerek husi ekipa investigasaun hamutuk nain 9 mesak Timoroan deit nia durasaun tinan ida.

"Ita hetan apoiu husi governu Fransa hodi halo produsaun ba livru hamutuk 100 ba iha primeiru no dadaun ne'e 40 ita haruka ona ba Ataúro no 60 ita distribui ba universidade sira." Nia salienta.

Enkuantu nia dehan, maské livru ne'e la tama iha kuríkulu nasional ensinu superior, maibé sai hanesan referénsia ida hodi tau iha biblioteka eskola nian

Entretantu Reitór Institutu Siénsia Saude (ICS) Leao Borges dehan, livru ne’ebé mak ministériu apoiu ne'e sei tau iha biblioteka no ba oin sei implementa mos iha instituisaun atu joven sira bele aprende kultura no lian balun husi Ataúro hodi bele dezenvolve iha futuru.

"Ha’u hanoin atu tau iha kuríkulu ne'e presiza perparasaun, maibé sai hanesan referénsia ida ba estudante sira aprende iha eskola ne'e depende ba desizaun husi intituisaun ida-idak karik ne'e nesesidade duni." Nia hateten.

Enkauntu nia dehan, livru ne’ebé mak sira simu hamutuk 15 ida ne'e seidauk sufisiente, tanba ne'e sujere atu governu bele aumenta tan.