Domingo, Abril 21, 2024
Total visitors: 766366

Dadus ne’ebé fó-sai husi Fundasaun Alola (FA) indika katak partisipasaun feto iha lideransa suku nian ba tinan 2023 hahú menus, tun ba 4% katak feto na’in 18 assume kargu lideransa suku, kompara ho eleisaun suku iha tinan 2016, ne’ebe partisipasaun feto iha lideransa suku hetan 5%, katak feto na’in 21.

Dadus ne’ebé fó-sai husi Fundasaun Alola (FA) indika katak partisipasaun feto iha lideransa suku nian ba tinan 2023 hahú menus.

Diretora FA, Maria Imaculada Guterres hateten haree ba dadus partisipasaun feto nian ne’ebé tun husi 5% ba 4%, iha eleisaun lideransa suku ne’ebé iha 2023 liubá, nune’e sira realiza diskusaun meza redonda atu bele halibur feto sira hodi enkoraja partisipasaun feto nian iha eleisaun sira tuir mai.

“Objetivu husi diskusaun meza redonda ne’e, mak atubele halibur feto potensial sira, feto ativista sira, feto akadémista, líder feto partidu politiku sira, estudantes sira, atu halibur rezultadu observasaun sira nomós rekomendasaun sira, hodi hadia partisipasaun feto nian iha eleisaun munisipal ne’ebé sei akontese tuir mai ne’e,” nia dehan iha Forum Meza redonda ho Tema “Investe ba Feto, Aselera Progresu” ne’ebé realiza iha edifísiu FA, Díli.

Iha fatin hanesan reprezentante Sekretária Estadu Igualdade (SEI), José de Carvalho hateten, diskusaun meza redonda refere realiza hodi aprende husi eleisaun suku 2023, hodi prepara feto potensial sira ba eleisaun munisipál 2024.

“SEI nafatin konsidera no tau atensaun ba orsamentu sira, hodi bele suporta asosiasaun feto sira iha nivel munisipal atu iha komitmentu servisu hamutuk hodi atinje objetivu hodi hasa’e persentajen inan feton sira no prepara sira-nia aan hodi hasoru eleisaun municipal. Oinsá atu hakbiit no kapasita ita-nia inan feton sira ne’ebé mak iha preparasaun ba iha eleisaun sira ne’ebé mak tuir mai,” nia dehan.

Iha parte seluk partisipante, Prisca Mizela de Jesus hateten, tuir nia haree iha tinan kotuk 2023 feto barak mak eleitu sira-nia aan ba iha eleisaun suku nian maibé 18 pesoas de’it mak liu.

“Iha tinan kotuk feto barak mak eleitu sira nia aan ba eleisaun suku maibe iha 18 pessoas de’it mak liu iha eleisaun refere. Iha ne’eba ema ladun haree ba igualdade jéneru, tanba sira haree katak iha sosiedade nia laran sira hanoin katak mane mak iha kapasidade boot liu feto sira, maibé ita haree ba realidade agora feto barak iha kapasidade atu lidera,” nia hatutan.

Nia husu ba feto maluk sira nafatin partisipa iha eleisaun sira tuir mai, tanba feto mós iha kapasidade no iha koñesimentu atu bele lidera.