Quinta, Julho 18, 2024

Ministerio Saúde (MS) fo sai katk identifika kazu virus HIV-SIDA foun iha Timor-Leste, iha tinan 2023 hamutuk na’in 220. Husi inisiu tinan 2003 to 2023 ministério konsegue identifika ona kazu pozitivu ba moras HIV-SIDA hamutuk na’in 2050 iha teritorio nasional laran.

Ministerio Saúde (MS) fo sai katak identifika kazu virus HIV-SIDA foun iha Timor-Leste, iha tinan 2023 hamutuk na’in 220.

Tecnico Superior Plano no Monitorizasaun iha Instituto Nasional Combate Moras HIV-SIDA (INCSIDA, IP),Elvis Martins, hateten durante sira servisu hamutuk ho MS sira identifika iha tinan kotuk 2023 kazu HIV-SIDA pozitvu foun aumenta tan 220, no ida ne’e signifika katak virus HIV-SIDA ne’e kontinua aumenta iha Timor-Leste.

“Ami durante ne’e hetan dadus hirak husi Ministerio Saúde kona-ba HIV-SIDA nian, iha tinan 2024 ami seidauk hetan dadus ruma, maibé dadus tinan ne’e MS iha ona, dadus iha inisiu 2003 to’o 2023 ami iha, entaun tuir dadus sira ne’ebé ami hetan, mak hanesan iha tinan 2023 ita iha kazu foun ba HIV-SIDA hamutuk 220,” nia hateten iha nia servisu fatin INCSIDA, IP, iha Pantai kelapa, Díli.

Nia haktuir, husi totál kazu total HIV-SIDA 2050 sira suporta hela tratamentu ba ema na’in 1060. No sees husi tratamentu no mate ema na’in 111. Halo tratamentu ikus mate ema na’in 206. Husi kazu foun deteta iha tinan 2023 nian na’in 220, la halo tratamentu ema na’in 64. transferénsia ba rai-liur ema na’in 45. Halo tratamentu iha sentru saúde rua ema na’in 43. Halai sai husi tratamentu saúde ema na’in 449.

Nia salienta, INCSIDA sei servisu makas ho MS hodi haree ba data sira hetan. Sira mos identifika katak maioria kazu foun ne’ebe deteta husi munisípiu 4 inklui Dili ho totál kazu HIV-SIDA na’in 1541, Bobonaro 113, Covalima 95, no Oecusse 65.

Iha fatin seluk Koordenadór Rede Sosiedade Sivil ba Asuntu Saúde, Joaquim Soares, husu ba ministériusaúde atu servisu makas hodi kombate virus HIV-SIDA iha Timor-Leste, atu nune’e virus ne’e labele hada’et husi ema ida ba ema seluk, liuhusi relasaun seksual no meiu seluk.

“Ita tenki halo sensiblizasaun makas ba ita-nia komunidade no joven sira. Nomós ita tenki kontrola maluk sira ne’ebé buka moris liuhusi relasaun seksual, ita tenki kontrola sira. Husu ba estadu tenki kontrola maluk sira ne’ebé hetan HIV-SIDA, sira iha direitu atu buka moris liuhusi meiu sira hanesan ne’e, maibé estadu tenki kontrola sira atu grante katak, ita-nia maluk sira-ne’e, labele hada’et virus ne’e ba ema seluk,” nia informa via telefone.

Nia hatutan katak kazu HIV-SIDA sai ona diskusaun boot ida iha públiku tanba ne’e estadu labele ignora no tenki iha planu atu nune’e bele prevene virus HIV-SIDA labele tranzmite tan iha komunidade le’et.