Domingo, Abril 21, 2024
Total visitors: 766366

Sekretariu Estadu Protesaun Sivil, liu husi Autoridade Protesaun Sivil (APC), asina protokolu koperasaun ho kompañia Timor Telecom (TT) ho objetivu atu dezemina informasaun konaba previzaun tempu, mapamentu risku dezastre ba komunidade, liu-liu kliente Timor Telecom ativu 400,000 hodi bele kuidadu no prevene aan bainhira akontese dezastre ruma.

Sekretariu Estadu Protesaun Sivil, liu husi Autoridade Protesaun Sivil (APC), asina protokolu koperasaun ho kompañia Timor Telecom (TT).

Sekretariu Estadu Protesaun Sivil, Domingos Mariano Reis hato’o apresiasaun extraordinariu ba kompañia Timor Telecom ne’ebé prontu atu dezemina SMS konaba previzaun tempu no mapamentu risku dezastre ba komunidade sira atu bele antisipa, liu-liu hases aan husi fatin risku ba fatin seguru.

“Ohin autoridade protesaun sivil digitaliza programa sira liu husi SMS Timor Telecom nian ne’ebé ami apresia extraordinariu kompañia Timor Telecom tanba kliente Timor Telecom purvolta nain 400,000 ne’ebé uza simcard Timor Telecom. Entau bainhira mensajen ne’ebé autoridade protesaun sivil passa ohin populasaun 400,000 resin asesu,” nia hateten hafoin asina protokolu kopersaun entre SEPS no TT, iha edifisiu SEPS Caicoli, Dili.

Nia espera komunidade, liu-liu kliente Timor Telecom 400,000 resin bele asesu SMS atu sira bele asegura aan labele fo ameasa ba vida no sira nia riku soin nune’e sira bele hases aan husi fatin risku ba fatin seguru.

Nia hatutan durasaun koperasaun ida ne’e ba tinan ida, entau durante periodu ne’e Timor Telecom dezemina SMS konaba mapamentu risku dezastre.

Iha parte seluk, Diretór Juridika Relasaun Institusionál Timor Telecom, Manuel Carceres hateten empreza iha responsabilidade sosial tanba ne’e bainhira iha pedidu husi APC konaba uza meus telekomunikasaun Timor Telecom atu divulga informasaun konaba dezastre naturais no previzaun tempu hetan kedas aprovasaun.

Nia garantia informasaun hotu-hotu ne’ebé autoridade protesaun sivil presiza divulga no sidadaun sira tenke hetan hanesan metrologia risku dezastre naturais liu husi SMS no kliente bele hatene hodi halo prevensaun.

“Lorloron ne’e 400,000 Timorense ativu uza simcard, entau iha aldeia ida ema nain tolu ka hat mak hetan SMS no lee mak informasaun ne’e divulga kedas ba ema seluk,” nia hateten.

Nia hateten ho asina protokolu koperasaun ne’e, sira iha komitmentu no prontu atu apoiu autoridade protesaun sivil oinsa servi diak liu tan povu no nasaun.