Fulan Rua AIFAESA La Halo Inspesaun Iha Merkadu

Inspektur Jéral Autoridade Inspesaun no Feskalizasaun Atividade Ekonomia, Sanitaria no Alimentar, Institutu Públiku (AIFAESA, IP), Ernesto Monteiro rekoñese hahu fulan-janeiru até fevreiru tinan 2024, institusaun ne’e la halo servisu inspesaun iha merkadu tanba funsionariu laiha atu halo servisu.

Nia dehan durante ne’e sira iha funsionariu hamutukna’in 123, maibe iha tinan kotuk funsionariu na’in 118 kontratu termina. Entau hela deit funsionairu permanente na’in Lima (5).

“Ohin hau hato’o durante ne’e funsionamentu AIFAESA, IP fakum ka lalao tanba funsionariu sira kontratadu hotu. Ohin orientasaun husi ministru nian ami sei hato’o numeru sira ne’ebé bele responde ba nesesidade servisu institusaun no ami sei planu hato’o proposta mai atu hetan aprovasaun hodi asegura funsionamentu servisu lao fali,” nia hateten hafoin halo enkontru ho Vice Primeru Ministru Asuntu Ekonomika, no Ministru Turismu no Ambiente, Francisco Kalbuady Lay iha Ministeriu Turismu Farol, Dili.

Nia hateten forsa servisu ne’ebé sira iha 123 mos la sufisiente atu kobre teritorio nasionál tanba ne’e hanoin atu aumenta rekursu humanu, maibe depende ba desizaun superior nian importante asegura servisu.

Nia hatutan funsionariu kontratadu sira ne’e iha kapasidade, abilidade no esperensia servisu tanba sira halao ona servisu inisiu estabelesementu AIFAESA iha tinan 2017.

Entretantu, Komunidade Dili, Matias Soares husu governu atu aselera prosesu rekrutamentu ba funsionariu sira atu halao servisu inspesaun ba produtu sira ne’ebé faan iha merkadu.

“Servisu AIFAESA nian importante tebes atu halo kontrolu maximu ba iha merkadu sira hodi asegura produtu aihan sira ne’ebé faan iha merkadu ne’e seguru ba konsumu ema nian,” nia hateten.

Iha parte seluk, Vice Primeru Ministru ba Asuntu Ekonomika no Ministru Turismu no Ambiente, Francisco Kalbuady Lay hateten fo ona orientasaun ba dirijente Institusaun Públika no Empreza Públika hamutuk 14 atu hare dezempeñu funsionariu kontratadu sira ne’e nian molok halo espansaun ba kontratu tanba balun nomeasaun politika.

“Hau entrega ona ba kada institusaun públiku no Empreza Públika sira hare. Sira ne’ebé iha kapasidade diak no servisu iha esperensia bele nafatin, iha fatin hotu-hotu tenke halo mos selesaun ida ne’ebé didiak tanba ita uza povu nia osan atu servi povu no ita sira servidor públiku tenke mai ho responsabilidade ida ne’ebé mak sentidu estadu, entau sei deit mak mai servisu iha institusaun no ministeiru tenke ho responsabilidade ho domin no hatene ida-ida nia knar,” nia hateten.

Nia haktuir institusaun públiku no Empreza Públiku sira hanesan Autoridade Inspesaun no Feskalizasaun Atividade Ekonomia, Sanitaria no Alimentar, Institutu Públiku (AIFAESA, IP), Servisu Rejistu no Verifikasaun Emprezarial Institutu Públiku (SERVE, IP), Instituto Nasionál de Dezenvolvimentu de Mão de Obra (INDIMO), Autoridade Turismu Timor-Leste (ATTL), Sentru Formasaun CNEFP Tibar, Sentru Nasionál Formasaun Profesionál (SENAI) Becora, Instituto de Apoio ao Dezenvolvimentu Emprezarial (IADE), Instituisaun Qualidade Timor-Leste (IQTL, IP), Sentru Bambu Timor-Leste, CLN, Trande Invest Timor-Leste.