Domingo, Abril 21, 2024
Total visitors: 766366

Ministru Interior (MI), Francisco da Costa Guterres rekoñese mediador feto nasionál sira nia koñesementu, kapasidade no abilidade ba promove paz, harmonia iha komunidade tanba ne’e sei promove liu tan feto nia partisipasaun iha hari paz no prevensaun konflitu iha rai laran.

Ministru Interior (MI), Francisco da Costa Guterres rekoñese mediador feto nasionál sira nia koñesementu, kapasidade no abilidade ba promove paz, harmonia iha komunidade tanba ne’e sei promove liu tan feto nia partisipasaun iha hari paz no prevensaun konflitu iha rai laran.

“Ita bo’ot sira ohin rona iha mediador feto ida espresa ninia esperensia sira feto durante ne’e halao servisu konsege rezolve problema lubun bo’ot ida tanba sira nia kapasidade hanesan mediadora no inan ida, entau sai fator determinante ida ema atu hato’o problema ba sira no husu sira ajuda rezolve sira nia problema tanba ne’e, hau hanoin ita promove feto ba mediasaun nasionál para atu rezolve problema sira iha kraik tanba dalabarak konflitu balun mane lakonsege rezolve ita haruka feto ba sira rezolve tanba sira ba ho kalma, buka intende problema particular balun ne’ebé importante tebes hodi rezolve problema ne’e,” nia hateten hafoin partisipa iha serimonia lansamentu PAN 1325 konaba feto pás no seguransa jerasaun daruak iha Hotel Timor, Dili.

Nia dehan iha Planu Asaun Nasionál (PAN 1325) konaba feto pas no seguransa, iha pilar importante hat mak partisipasaun, prevensaun, protesaun no hari pás. PAN foun 1325 artikula estratéjia ida ne’ebé kompriensivu hodi responde ba nesesidade evolusaun feto no labarik feto sira nian atu responde ba risku seguransa tradisional no risku sira seluk ne’ebe mosu inklui impaktu dezastre ne’ebé kauza husi mudansa klimatika, seguransa sibernetika no trafiku umanu.

Nia hateten jerasaun daruak PAN 1325 (2024-2028) ne’e hakarak promove feto sira nia partisipasaun tomak no lideransa ne’ebé signifikantivu no igual iha pas no seguransa, no iha prevensaun no rezolusaun konflitu komunitariu, resposta ba dezastre no umanitaria, no habelar kontestu sira konaba feto sira nia papel iha foti desizaun iha setór seguransa no justisa no ba nivel governasaun hotu-hotu.

Entretantu, Mediadora Nasionál, Joaquina Soares hateten prezensa feto sira nian nudar mediador la fasil iha sosiedade ida ne’ebé mai ho estereotipu jéneru no normas injustisa ne’ebe klean tebes.

Nia dehan ema barak dehan feto laiha aten brani no kapasidade atu fasilita rezolusaun konflitu ida ho susesu, maibe nafatin esforsu aan hodi hakotu prekonseitu jéneru sira ne’e no hatudu ba ema hotu katak feto mak ajente ba pás nian ne’ebé iha kibi’it bo’ot tebes.

“Iha tinan 13 ikus ne’e nian laran, atan hau asumi hau nia knar nudar mediadora nasionál serbi komunidade ho esperensia, koñesementu no abilidade profesionál. Ami feto sira nafatin kadi ami nia abilidades nudar mediador, prova beibeik husi tempu ba tempu katak jeneru laos sai barreira ida atu hetan susesu,” nia hateten.

Nia informa Diresaun Nasionál Prevensaun Konflitu Komunitaria, iha Ministeriu Interior, iha mediador hamutuk 228 kompostu husi feto nain 133 no mane 95, ne’ebé destaka iha munisípiu hotu atu oferese servisu ho profesional no gratuita tulun parte sira ne’ebé iha hela disputa laran.

Nia haktuir durante ne’e sira konsege rezolve ona disputa barak ne’ebé karik la rezolve bele rezulta violénsia no krime hanesan konflitu violentu iha Leorema.

Iha parte seluk, Reprejentante UN Women iha Timor-Leste, Nishtha Satyam hateten Timor-Leste halo ona progresu signifikante hodi promove feto sira nia partisipasaun no lideransa iha papél foti desizaun iha nivel nasionál no promove igualidade jéneru iha forsa seguransa nasionál nia laran.

“UN Women kongratula governu Timor-Leste tanba aprova ona PAN feto pás no seguransa faze daruak nian. Ida ne’e marka kompromisu ida atu hametin liu tan ajenda feto pás no seguransa iha nasaun ne’e. UN Women sei kontinua fo apoiu ba implementasaun no monitorizasaun ne’ebé efetivu ba PAN foun 1325 nian ne’ebé halibur hamutuk feto sira nia partisipasaun no lideransa iha setór hotu-hotu iha governu no sosiedade,” nia hateten.