Terça, Maio 21, 2024
Total visitors: 766366

Jestór Infrastrutura, iha Bee Timor-Leste Empreza Públika (BTL, E.P), Estelio Manuel hateten projetu melloramentu sistema fornesementu bee moos iha kapital Postu Administrativu Laga Munisípiu Baucua, paradu tinan ida resin tanba iha mudansa ba items servisu, ne’ebé presiza halo re-levantamentu.

Jestór Infrastrutura, iha Bee Timor-Leste Empreza Públika (BTL, E.P), Estelio Manuel hateten projetu melloramentu sistema fornesementu bee moos iha kapital Postu Administrativu Laga Munisípiu Baucua, paradu tinan ida resin.

Nia dehan kompañia Suli-Bere Rai Kiak Unip, Lda la abandona projeitu ne’e, maibe provizoriu paradu tanba strutura rai fatuk deit tenke halo mudansa ba items material husi poly ba besi kanu.

“Projeitu ne’e laos abandona, maibe paradu razaun iha mudansa ba items servisu nian, liu-liu item poly ne’e ba fali kanu tanba iha Laga postu tuan ne’e fatin sira fatuk labele kee atu hakoi pipa. Ami lori skavador ba kee mos labele, entau ami halo mudansa ba item uza fali kanu atu lapresiza kee rai hakoi,” nia hateten iha servisu fatin Colmera, Dili.

Nia hateten hafoin halo re-levantamentu no verifikasaun iha semana kotuk aprova ona mudansa item ne’e tanba ne’e kompañai bele hahu ezekuta fali servisu iha treinu.

Nia garantia kompañia hahu fali halao servisu no sei aselera servisu ida ne’e atu fornese bee ba uma kain sira iha kapital postu inklui edifisiu públiku sira.

Nia hatutan dificuldade ne’ebé kompañia sira enfrenta mak asesu ba material sira tanba kuaze material hotu-hotu tenke hatama husi rai liur entau presiza tempu ne’ebé kleur.

Iha parte seluk, Xefe Suku Soba iha Postu Administrativu Laga Munisípiu Baucau, Francisca Monica de Fátima Soares lamenta projeitu ne’e eziste iha Suku Soba, maibe sira la hetan informasaun husi kompañia vensedor husik deit.

Nia dehan projeitu ne’e sei benefisia komunidade sira iha suku Soba no Samalari inklui edifisiu públiku sira hanesan administrasaun postu, eskola, merkadu, igreja, fasilidade saúde sira.

“Iha fulan-janeiru tinan ne’e, hau ba koalia ho administrador postu atu kontaktu kompañia no kompañia rasik dehan mai halo justifikasaun, maibe la mai to’o administrador mos troka ona,” nia hateten.

Nia hateten bazeia ba informasaun husi plaka, projeitu ne’e hahu iha dia 27 fulan-abril tinan 2022 no entrega iha loron 27 fulan-October tinan 2022, maibe tinan ida resin ona projeitu lalao.

Nia hateten projeitu ne’e tama iha projeitu melloramentu sistema bee urbana postu administrativu nian no montante orsamentu ba projeitu refere hamutuk $221,829.25.