HNGV Iha Deit Kama Baixa Hamutuk 425

Diretóra Ezekutiva Hospital Nasionál Guido Valdares (HNGV), Cecilia Barros Mendonca informa kapasidade hospital nasionál intermus espasu ba deit kama 300, maibe nesesidade barak aumenta kama iha koridor sira hamutuk 425, maske sei la sufisiente tanba ne’e dalabarak obrigadu pasiente tenke demora iha sala emergensia hodi hein baixa ba enfermaria sira.

Nia dehan durante ne’e HNGV simu referal pasiente sira husi hospital referral Baucau, Maubise, Maliana, Suai, Rejiaun Administrativu Espesial Oecusse-Ambeno (RAEOA) no sentru saúde sira iha teritorio tomak inklui klinika privadu sira tanba funsionamentu iha fasilidade sira ne’e seidauk maximu intermus rekursu umanu espesialista, ekipamentu, no medikamentu.

“Total kama agora iha hospital hamutuk 425, sufisiente la sufisiente ne’e planu governu nian atu hare ba vizaun hospital nian sai oinsa,” nia hateten iha servisu fatin Bidau, Dili.

Nia hateten infrastrutura hospital ne’e obra Indonesia nian ne’ebé husik hela tanba ne’e halo esforsu rehabilita no halo espansaun tan ba fatin balun atu bele fo atendimentu ba komunidade sira hodi hein desizaun governu nian.

Nia hatutan kada loron pasiente ne’ebé tama iha sala urgensia hospital nian hamutuk 150 até 200, husi numeru ne’e barak tenke baixa hodi hetan tratamentu intensivu husi mediku sira.

Entretantu, Xefe Sentru Saúde Comoro, Emilia Ayati de Sousa, hateten numeru média ba kazu tranferensia moras ba Hospital Nasionál Guido Valdares (HNGV) kada loron nain 3 até 5 tanba kazu sira ne’e labele atende iha sentru saúde.

“Transferensia moras ne’e hare ba kazu, kazu ne’ebé presiza refere ami halo referal tanba ho kondisaun ne’ebé grave ami labele atende iha ne’e, laos kontratadu para ema limitadu mak ami transfere kazu,” nia hateten.

Iha parte seluk, Vice Primeiru Ministru no Ministru Koordenador Asuntu Sosial no Ministru Dezenvolvimentu Rural, Mariano Assanami Sabino rekoñese funsionamentu atendimentu iha hospital referral sira seidauk maximu tanba orienta ona Ministra Saúde atu bele halo prosesu rekrutamentu ba profesionais saúde sira ne’ebé kualifikadu atu apoia iha hospital referal sira.

Nia dehan governu tenke duni ona halo investimentu hodi hadia infrastrutura HNGV no eleva kapasidade hodi fo atendimentu saúde tersiariu ba komunidade sira.

“Hanoin ba futuru ita tenke hadia duni Hospital Nasionál Guido Valdares sai hospital ida diak. Hau orieta ona ba ministra no vice nain rua, ho sira nia tempu ne’ebe lao to’o periodu tinan lima ne’e duni mak ita tenke hadia hospital,” nia hateten.