Terça, Maio 21, 2024
Total visitors: 766366

Ministru Justisa (MJ) Amândio Benevides hateten sira dezenvolve ona sistema halo agendamentu online ba passaporte nian atu fasilita komunidade sira labele hotu-hotu ba hobur iha edifisiu notariadu.

Ministru Justisa (MJ) Amândio Benevides hateten sira dezenvolve ona sistema halo agendamentu online ba passaporte nian.

“Ita sei halo agendamentu online ne’ebé hotu-hotu sei liu husi online ne’ebé sei la ba bou hotu iha ne’eba. Ita hein katak semana ne’e lansa ona atu nune’e lorloron ida atende deit 140 atu ema labele ba bou iha ne’eba no fo mos tempu ba ita nia passaporte mai,” nia hateten iha Palasio Governu, Dili.

Nia dehan durante ne’e, loron ida atende ema 1000 to’o 2000, entau kaderneta passaporte ne’ebe mai bele 20000 to’o 100000 mos hotu kedas no barak liu trata tiha passapote mos la halo viajen.

Nia hateten kaderneta passaporte 20000 resin mak to’o tan ona iha rai laran no kompañia sei kontinua hatama to’o 57000.

Iha parte seluk, komunidade Simão Soares hateten ohin loron nesesidade ba passaporte makas tebes tanba oportunidade servisu iha rai liur barak no ema barak mos hakarak ba eskola iha rai liur.

“Agradese kaderneta passaporte iha ona no espera hau bele hetan tanba dala rua ba mai Dili no Viqueque laiha rezultadu,” nia hateten.

Nia hateten passaporte ne’e dokumentu legal ne’ebé sidadaun sira iha direitu atu hetan tanba ne’e obrigasaun governu nian atu hakonu direitu fundamental ida ne’e hodi fasilita sidadaun sira ba eskola, servisu iha rai liur tanba demanda servisu iha rai liur bo’ot tebes.