Terça, Maio 21, 2024
Total visitors: 766366

Membru Parlamentu Nasionál, Deputado Antonino Bianco hateten prestasaun servisu saúde iha teritorio tomak paralizadu tanba profesionais saúde laiha fasilidade saúde taka no sira ne’ebé loke aimoruk laiha atu fo atendimentu ba komunidade.

Membru Parlamentu Nasionál, Deputado Antonino Bianco hateten prestasaun servisu saúde iha teritorio tomak paralizadu.

Nia dehan governu aktual tenke responsabiliza buka rezolve urgente problema ida ne’e labele fo sala fali governu anterior tanba orsamentu iha hela.

“Ita ukun ita tenke responsabiliza ita nia programa tanba orsamentu iha hela,” nia hateten iha plenaria parlamentu nasionál, Dili.

Nia husu membru parlamentu sira hotu tantu bankada governu no opozisaun sira atu honestu ba problema ne’ebé akontese no hamutuk ho governu buka solusaun tanba povu halerik hela ba atendimentu saúde.

“Foin lalais akontese oioin ema halerik se ita nega, entau ita nega ita nia aan no ita laiha sentiment ida pertensia ema seluk nia terus, ida ne’e mak ita atu dehan ita reprezenta povu baut ne’ebé lalos ita dehan laloos tenke hadia no ida ne’ebe loos ita dehan loos,” nia hatutan.

Entertantu, Deputadu José da Cruz hateten desizaun ne’ebé governu foti hodi hapara kontratadu sira ne’e la kuidadu ikus mai povu kibi’it laek sira mak simu konsekuensia tanba postu saúde sira laiha atendimentu obrigadu pasiente sira tenke mai hotu iha sentru saúde no hospital.

Nia dehan iha postu administrativu Kailako iha postu saúde sia, maibe postu hitu mak taka tanba laiha profesionais saúde.

“Ohin loron hospital referal Maliana ne’ebé sentru ba sentru saúde hotu laiha antibiotika, laiha reajente. Entau haruka ema hotu mai iha Dili to’o iha ne’e mos aimoruk laiha, ne’e ita atu dehan saida ita iha situasaun ameasadu nia laran,” nia hateten.

Hatan ba kestaun ne’e, Ministra Saúde, Doutora Élia dos Reis Amaral hateten problema aimoruk laiha ne’e akontese kedas iha governasaun da-ualu kuaze aimoruk 100 resin items mak laiha tanba ne’e iha orsamentu ratifikativu governu tau 6 milhoens atu sosa aimoruk, ne’ebé aimoruk sira ne’e iha prosesu tama mai Timor.

“Ita halo ajudikasaun direita ho karakter urjensia para responde ba situasaun ne’e. Ita bo’ot sira hatene no akompañia orsamentu ratifikativu iha fulan-setembru prosesu administrasaun han semana ualu, entau kompañia responde ona iha dia 20 fulan-dezembru liu ba aimoruk no konsomoves,” nia hateten

Nia hateten aimoruk barak to’o tan iha dia 15 fulan-janeiru no sei mai tan iha fin do fulan-janeiru nian hodi responde ba nesesidade.

Konaba rekursu humanu, nia dehan prosesu rekrutamentu ba profesionais saúde faze dahuluk finaliza ona, ne’ebé distribusaun sei foku ba Hospital Nasionál Guido Valdares (HNGV) no servisu ambulansia nian.