Terça, Maio 21, 2024
Total visitors: 766366

Xefe Departamentu Investigasaun Kriminal, Polisia Nacional Timor-Leste (PNTL), Superintendente João Belo dos Reis informa iha loron 8 fulan-janeiru 2024, sira trava tan viajen sidadaun Timor-oan nain neen (6) ba nasaun Cambodia tanba iha indikasaun makas katak ema hira ne’e vitima krime trafiku humanu.

Xefe Departamentu Investigasaun Kriminal, Polisia Nacional Timor-Leste (PNTL), Superintendente João Belo dos Reis informa iha loron 8 fulan-janeiru 2024, sira trava tan viajen sidadaun Timor-oan nain neen (6) ba nasaun Cambodia.

Nia dehan depois servisu imigasaun iha Aeroportu Internasional Nicolau Lobato, Dili, deteta sidadaun sira ne’e nia dokumentu, liu-liu tikete atu fila laiha no visa atu tama Cambodia laiha tanba ne’e imigrasaun kontaktu parte investigasaun hodi halo identifikasaun no investigasaun.

“Husi identifikasaun ne’ebé ita halo, ita hetan katak sira atu ba nasaun Cambodia ho intensaun atu servisu iha Casino. Maibe rekrutamentu ne’ebé halo ne’e la liu husi prosesu legal katak primeiru ita nia governu SEFOPE lahatene, kompañia ne’e rasik la rejistu iha Timor no ema halo rekrutamentu ba sira laos iha Timor, nune’e ita konsidera ne’e suspeitu makas ba krime trafiku humanu,” nia hateten iha konferensia imprensa iha Komando Jéral Caicoli, Dili.

Nia hateten informasaun ne’ebé iha katak sidadaun sira ne’e rekruta husi kompañia multi game via online, maibe sira rasik la koñese empreza ne’e nia nain tanba durante ne’e halo video call la hatudu oin.

Nia hatutan PNTL nafatin halo identifikasaun, iha ema balun mak fasilita sira tantu Timor-oan no estrajeiru posivel servisu ho Interpol atu kaptura sira.

Tuir infomasaun iha tinan 2022, PNTL mos re-integra sidadaun na’in 63 ne’ebé sai vitima ba trafiku umanu iha nasaun Malasia ba familia. Ne’ebé nia prosesu lao hela autor balun tama ona prizaun preventiva.

Iha parte seluk, Presidente Konfederasaun Sindikatu Timor-Leste (KSTL), Almério Vila Nova konsidera Timor iha ona situasaun emergensia ba krime trafiku umanu tanba sidadaun barak mak sai ona vitima ba manobra trafikante sira nian.

Nia dehan joven lubun ida mak agensia rekruta ilegalmente ba iha Portugal, Dubai, Malasia no foin lalais atu ba Cambodia, ne’ebé autoridade seguransa konsegue salva.

“Buat ne’ebe KSTL alerta mak governu presiza urjénte hadia politika empregu nian, haforsa lei trafiku umanu no hadia povu nia moris tanba pontu sira ne’e asaun konkretu ne’ebé bele kontribui ba kombate sidadaun sira labele sai vitima ba trafiku umanu,” nia hateten.

Nia hateten dezafiu ne’ebé nasaun enfrenta hanesan oportunidade servisu menus, rendimentu sosiedade nian ki’ik no ema barak mak moris susar sai fator prinsipal ne’ebé bele dudu sidadaun sira involve iha krime trafiku umanu no sai vitima ba trafiku uma.

Nia hatutan governu tenke hadia duni politika empregu hodi loke oportunidade servisu ba joven hotu-hotu iha rai laran labele hanoin deit empregu externu tanba laos joven hotu-hotu hetan oportunidade servisu iha rai liur.