Terça, Maio 21, 2024
Total visitors: 766366

Diretór Jerál Servisu Korporativu, iha Ministeriu Saúde, Marcelo Amaral rekoñese profesionais saúde nain 2,256 kontratu remata ona iha fulan-dezembru tinan 2023, automatikamente fo impaktu ba funsionamentu servisu atendimentu saúde. Maibe sira halo esforsu atu aselera prosesu rekrutamentu atu bele asegura funsionamentu atendimentu saúde ba komunidade.

Diretór Jerál Servisu Korporativu, iha Ministeriu Saúde, Marcelo Amaral rekoñese profesionais saúde nain 2,256 kontratu remata ona iha fulan-dezembru tinan 2023.

Nia dehan funsionariu kontratadu sira ne’e iha kategoria tolu mak kontratadu ba servisu regular nian, kontratadu ho fundu Covid-19 atu apoia servisu no kontratadu ba servisu saúde na familia.

“Kontratadu sira ne’ebé utiliza fundu Covid-19 tenke para tanba fundu hotu ona iha tinan 2023 tanba 2024 laiha ona fundu signifika sira tenke termina kontratu, karik institusaun sira presiza tenke planu ba rekrutamentu. Kontratu sira uluk rekruta ba kategoria ida bolu pessoal saúde kontratadu ba servisu saúde na familia ne’e mos para tanba programa ne’e tuir orientasaun politika dehan governu muda politika automatikamente programa ne’e ita re-avalia fali, entau kontratu ita termina,” nia hateten iha servisu fatin Kaikoli, Dili.

Nia hateten profesionais saúde sira ne’ebé kontratu ba servisu regular, presiza halo avaliasaun dezempenho, disponibilidade orsamentu no importansia posizaun ne’ebé iha tanba ne’e sei halo mapamentu pessoal institusaun hodi foti desizaun.

Nia hatutan orientasaun ne’ebé iha hatudu iha esepsaun ba postu saúde sira ne’ebé laiha profesionais saúde permanente iha deit mak funsionariu kontratadu sei mantein atu asegura funsionamentu.

Nia haktuir funsionariu kontratadu sira ne’e kompostu husi pessoal kondutor, pessoal limpeza no maioria profesionais saúde.

Tuir dadus Ministeriu Saúde, total funsionariu kontratadu hamutuk na’in 2,256 kompostu husi na’in 885 kontratu ho fundu Covid-19, na’in 700 resin kontratu apoia servisu saúde na familia no seluk kontratu ba servisu regular. Alende ne’e funsionariu permanente hamutuk na’in 3,559 kompostu husi rejime espesial na’in 3,164 no rejime jeral iha na’in 385.

Entretantu, Diretóra Ezekutiva Hospital Referensia (HR) Maubisse, Doutora Gabriela Pereira hateten rekursu humanu limitadu tebes atu asegura atendimentu ne’ebé maximu ba komunidade sira tanba profesionais saúde nain 24 mak kontratu termina ona.

“Implikasaun ba atendimentu iha tanba rekursu humanu limitadu. Ami hato’o ona karta no verbal ba Nai ulun sira,” nia hateten.

Nia hateten sira nain 24 ne’e tama iha kontratadu ba servisu regular tanba ne’e hein hela autorizasaun husi nasionál atu bele kontratu foun tanba sira nain 24 nudar profesionais saúde ba atendimentu kliniku nian, entau sira nia servisu ne’e importante tebes.

Iha parte seluk, Membru Parlamentu Nasionál, Deputada Helena Martins Belo husu governu urjente rezolve problema rekursu humanu no medikamentu tanba fo risku ba vida komunidade sira nian, liu-liu pasiente sira ne’ebé presiza atendimentu saúde.

Nia dehan iha orsamentu ratifikativu tinan 2023, parlamentu aloka orsamentu 6 milhoens atu sosa aimoruk.

“Governu tenke hola pozisaun ida atu atende duni ba nesesidade povu nian ho urgente no emediata tanba osan iha hela,” nia ejiji.