PNTL La Tolera Sidadaun Sivil Ataka Membru Polisia

Komandante Polisia Nasionál Timor-Leste (PNTL), Munisípiu Dili, Superintendente Xefe Polisia Orlando Gomes, hateten polisia prontu halao knar ho profesionalismu, maibe la tolera individu no grupo sira ne’ebé ataka membru polisia iha terenu.

Nia dehan membru polisia sira sei uza forsa hasoru grupo sira ne’ebé kria instalilidade no halo ataka hasoru autoridade seguransa sira.

“Hahu ohin ba oin komandu sei la tolera grupo sira ne’ebé hakarak kria instabilidade no ataka hasoru autoridade. Ne’e polisia sira sei halo atuasaun rigorozu liu tan ho forsa,” nia hateten iha servisu fatin Caicoli, Dili.

Nia hateten sira rejista kazu balun konaba agresaun hasoru membru polisia sira iha terenu inklui kazu ida ne’ebé akontese iha suku Kampun Alor, iha dia 7 fulan- janeiru tinan 2024 foin lais. Kazu refere grupo joven sira tuda hasoru membru polisia sira, bainhira halo atuasaun ba konfrontu ne’ebé akontese.

Nia haktuir sira halo ona kapturasaun ba joven sira ne’ebé tuda hasoru autoridade seguransa hamutuk na’in 15 tanba involve krime obstrusaun autoridade públika, no prosesu krime lao hela.

Entretantu, Diretór Ezekutivu Fundasaun Mahein (FM), Nélson Belo hateten aktu desrespeitu hasoru autoridade públika rejista barak laos deit autoridade seguransa, maibe autoridade justisa, edukador no saúde.

“Estadu ida ne’e durante harii to’o agora laiha programa ida konaba character building. Ita nia lideransa sira iha Timor ne’e halo politika deit hatun malu no hasa’e malu. Maibe programa konkretu konaba character building ba sidadaun laiha tanba ne’e sintomas ida ne’e hatudu ema liu-liu joven sira desrespeita ba autoridade estadu nian barak liu tanba edukasaun, moral, no character building la sai prioridade,” nia hateten.

Konaba atuasaun polisia nian ba ema sivil no grupo ne’ebé ataka membru polisia, nia dehan PNTL iha knar tomak atu restora orden para ema labele halo ataka arbiru no hapara violensia.

“Autoridade iha Standar Operational Procedure, utiliza ida ne’e para atu labele hamosu violensia ida ne’ebe rigorozu. Maibe kuandu autoridade seguransa iha ameasa laran, hau hanoin sira iha direitu atu defende aan,” nia hatutan.

Iha parte seluk, Membru Parlamentu Nasional, Deputada Olinda Guterres, kongratula PNTL ne’ebé halao servisu ho maximu iha periodu Natal no tinan foun ne’ebé lao hakmatek.

“Hau hato’o parabens ba ita bo’ot sira tanba ita bo’ot sira nia servisu diak tebes la hare ba kor, kuandu problema ruma mosu ita bo’ot sira sempre to’o iha fatin,” nia dehan.