Quinta, Julho 18, 2024

Primeiru Ministru (PM) Kay Rala Xanana Gusmão, enkoraja grupo koperativa sira iha munisípiu hotu atu mobiliza komunidade sira kuda sorgum tanba produtu ida ne’e multifunsaun hahan ba ema, animal no sai mos material prima ba industria.

Primeiru Ministru (PM) Kay Rala Xanana Gusmão, enkoraja grupo koperativa sira iha munisípiu hotu atu mobiliza komunidade sira kuda sorgum.

Nia dehan kontente hare grupo koperativa barak mak servisu diak tebes ho apoia husi Sekretariu Estadu Kooperativa (SECooP) hasa’e produsaun Batar no Foos Kaylara (BAFO-Kayrala) no produtu sira seluk.

“Ohin loron ita hotu hatene problema foos mai hotu husi rai liur tanba bee latama iha kanu irigasaun. Natar presiza bee barak, karau no traktor fila rai, Sorgum la presiza bee barak no ita bele silu dala tolu. Silu dala ida tesi tiha hun fo han karau moris fali no produs fila fali, ne’ebé grupo koperativa sira bele mobiliza servisu ida ne’e ho diak,” nia hateten iha ambitu lansamentu feira produtu koperativa ho tema konsumu saida mak ita kuda no kuda saida mak ita konsumu, iha portu Dili.

Nia konsiente ema nia hanoin ba negosiu ne’e sei minimu tebes, ne’e mak sei sai problema tanba produtor sira produs aifuan barbarak laiha ema mak sosa hodi diversifika, entau sira rasik mak lori tun mai Dili faan iha dalan ninin sira to’o loron tolu produtu sira ne’e estragadu ona.

Nia hateten governu sei kria kondisaun atu iha ema ne’ebé ba sosa produtu agrikultor sira nian iha fatin lori mai faan ba grupo sira ne’ebé iha nasionál halo diversifikasaun ba produtu sira ne’e hodi kontribui ba redus importasaun.

“Iha programa governu da-sia nian atu loke kreditu asesivel katak funan la bo’ot hodi ajuda no dudu empreza ki’ik sira tanba se hau produs hau mak tenke ba faan ne’e laos business. Business mak hau produs ema ida mai sosa nia faan ba ema seluk ne’ebe produs ba buat oioin,” nia hateten.

Nia hatutan presiza mak haluan to’os sorgum iha fatin barak no eduka sosiedade konaba funsaun produtu sorgum bele halo produtu saida deit hodi motiva ema hotu-hotu kuda.

Entertantu, Sekretariu Estado Kooperativa (SECooP), Arsénio Pereira da Silva hateten sorgum sai programa primadona, maibe produtu sira seluk mos sai prioridade tanba foku governu nian mak kooperativa produsaun.

“Ami lansa kuda iha fulan hat kotuk, foin lalais hau ba koleta iha Suai udan been laiha, maibe koileta ho rezultadu ami sukat hektar ida hetan 1.5 tonelada. Signifika nia bele adapta iha kualker fatin no klima, liu-liu agora ita iha situasaun mudansa klimatika,” nia hateten.

Nia hateten sira halo ona diskusaun ho Ministeriu Edukasaun no agensia WFP atu integra produtu sorgum hanesan menu ida iha programa merenda eskolar ba labarik sira tanba produtu ne’e iha valor nutrisaun aas hanesan kalori 332 gram, Bokur 3.30 gram, Proteina 11 gram, karbonhidratu 73 gram, bee 11.20%, serat 2.30%, kalsium 28 mg, fosfor 287 mg no zat besi 4.40 mg.

Iha parte seluk, Portavoz rede Koligasaun Agrikultura Timor-Leste (KATL), Lucia da Costa hateten sira nia observasaun nota estadu seidauk hatudu dezempenho signifikativu ba investimentu real iha setór produtivu no importante sira ne’ebé sai baze ba ekonomia.

“Proposta OJE tinan 2024, kontinua la hatudu politika konkretu oinsá buka dalan hodi diversifika ekonomia ida ne’ebé reziliente no sustenavel. Alokasaun orsamentu iha setór agrikultura kada tinan laiha mudansa OJE tinan ne’e mos hetan deit 1.2% husi total orsamentu jeral estadu 2024,” nia hateten.

Iha oportunidade ne’e, rede kontinua fo hanoin governu da-sia no Parlamentu Nasionál atu fo prioridade no investe makas iha setór produtivu sira hanesan agrikultura, turizmu, peskas laos fo prioridade bo’ot liu ba setór industria mina no gas hanesan projeitu tasi mane no greater sunrise.

Nia dehan Timor-Leste konsidera hanesan nasaun ne’ebé vulneravel liu hasoru mudansa klimatika tanba falta kapasidade no rekursu bainhira hasoru El-nino no La-Nina. Nune’e mos, dadus governu nian hatudu problema kiak, in-seguransa aihan, malnutrisaun, dezigualidade sosial sei aas iha area rural sira ne’ebé maioria povu moris hanesan agrikultor.