Terça, Maio 21, 2024
Total visitors: 766366

Diretór Nasionál Empregu Estranjeiru, iha Sekretáriu Estadu Formasaun Profesionál no Empregu (SEFOPE), João Correia Pereira informa trabalhador na’in 834 husi total 5000 ne’ebé servisu hela iha Australia, sai husi sistema ka la servisu ona ho empreza ne’ebé fo kontratu insiu.

Diretór Nasionál Empregu Estranjeiru, iha Sekretáriu Estadu Formasaun Profesionál no Empregu (SEFOPE), João Correia Pereira informa trabalhador na’in 834 husi total 5000 ne’ebé servisu hela iha Australia, sai husi sistema.

Nia dehan fator ne’ebé dudu trabalhador sira sai husi sistema mak barak liu divorsiu, liu-liu laen no fen kaben iha ne’e sira ba servisu iha Australia iha relasaun ho ema seluk deside la fila hotu mai Timor. Alende ne’e iha balun problema ho empreza liu-liu la komprende kontiudu kontratu sira to’o iha Australia la satisfas deside sai husi empreza ne’e ba servisu iha fatin seluk.

“Ita triste oituan tanba numeru ne’e sa’e ba beibeik kada semana, laos fulan. Entaun ita espera tinan oin 2024, imi nain hira ne’ebe atu ba labele banati tuir buat ne’ebé ladiak tanba ita nia estadu la halo programa ida ne’ebe prejudika fali sidadaun ida tan ne’e depende fali ba ita bo’ot sira,” nia hateten iha serimonia despedida ho trabalhador na’in 119 ne’ebé atu aranka ba Australia iha inisiu tinan 2024, iha edifisiu SEFOPE Kaikoli, Dili.

Nia hateten trabalhador sira ne’ebé sai husi sistema ne’e barak liu sira ne’ebé foun kuaze na’in 544 kompara ho sira ne’ebé ba fila-fila ona. No trabalhador sira ne’e barak liu ho kontratu servisu fulan neen to’o fulan sia nian.

Nia hatutan trabalhador ne’ebé sai husi sistema barak liu husi munisípiu Dili na’in 198, Bobonaro 91, Ermera 94, Lautem 79, Viqueque 65, Baucau 68,Aileu 52, Covalima 44, Ainaro 35, Manatutu 26, Manufahi 26, Liquiça 24 no Rejiaun Administrativu Espesial Oecusse Ambeno (RAEOA) 12.

Nia haktuir situasaun ne’e iha influensia tanba empreza agora hatene ona karakter ema kada munisípiu nian, entaun iha posibilidade bo’ot kouta ba munisípiu sira ne’ebé ema sai husi sistema aas bele demanda menus.

Iha parte seluk, Presidente Konfederasaun Sindikatu Timor-Leste (KSTL), Almério Vila Nova hateten trabalhador sai husi sistema ladun prejudika kondisaun servisu tanba Australia buat hotu lao tuir regras no aplikasaun lei ne’ebé forte tebes no prezensa uniaun sira nian iha servisu fatin mos forte tebes. Entaun intermus kondisaun servisu laiha problema, maibe governu mak labele kontrolu ho diak.

Nia dehan sira iha koperasaun ne’ebé diak tebes ho United Workers Union no Migrant Workers Center iha Australia atu halo vizilansia ba servisu fatin sira tau matan no fo protesaun ba trabalhador sira.

“Ho koperasaun KSTL ho United Workers Union no Migrant Workers Center ne’e hatudu katak Timor-oan ne’ebé servisu iha ne’ebá hetan asistensia legal no protesaun husi organizasaun ne’e iha Australia,” nia hateten.

Nia hateten demanda servisu iha Australia bo’ot tanba kada semana Timor-oan lubun ida ba nafatin Australia, ne’e positivu tebes atu hadia ekonomia familia no nasaun nian. Maibe governu mos tenke estabelese lei espesifiku ida atu fo protesaun ba Timor-oan sira ne’ebe servisu iha rai liur tanba sira mak heroi ba ekonomia familia no nasaun nian.

Nia mos sujere ba SEFOPE atu kria diresaun espesifiku hare ba asuntu migrante nian tantu externa no interna.