- Publika iha: 08 Janeiro 2024
Diretora Ezekutiva Organizasaun Strela+, Ines Lopes hateten video dokumentáriu ne’ebé sira prodús hatudu stigma no diskriminasaun hasoru ema moris ho HIV barak husi servisu nain saúde sira, tanba ne’e husu intervensaun Ministériu Saúde nian atu halakon stigma no diskriminasaun, promove teste ba ema hotu no tratamentu ba sira ne’ebé pozitivu afetadu.
Nia dehan stigma no diskriminasaun hasoru ema moris ho HIV sei makas no ida-ne’e sai dezafiu prinsipál ba estadu atu redús transmisaun foun, tanba ema sei moe no tauk halo teste, hado’ok aan husi tratamentu.
“Ita fó sai video ne’e atu husu intervensaun husi governu, sosiedade sivíl, lideransa relijiozu sira atu halo intervensaun hodi ajuda hadia sistema no polítika sira ne’ebé iha, liu-liu nia implementasaun sira,” nia hateten hafoin partisipa iha lansamentu video dokumentáriu lian husi ema moris ho HIV iha Fundasaun Oriete, Díli.
Nia hateten ema moris ho HIV tinan barak hetan esperiénsia negativu sira husi família no entidade servisu nain sira, ne’ebé halo sira barak hetan depresaun.
Nia hatutan abut husi stigma no diskriminasaun mak falta konfidensialidade husi servisu nain saúde sira, tanba sira mak ema dahuluk hatene statutu saúde pasiente nian.
Entretantu, Adjunta Reprezentante UNFPA iha Timor-Leste, Doutora Domingas Bernardo, preokupa stigma no diskriminasaun sei makas husi pessoal saúde sira, tanba falta informasaun ne’ebé apropriadu bazeia ba siénsia.
“Ha’u preokupa desde uluk kedas, tanba ha’u-nia família balun mós sai vítima ba stigma no diskriminasaun. Nia mós pessoal saúde, maibé nia mate, tanba lakohi ba halo tratamentu,” nia hateten.
Nia hateten koñesimentu sosiedade nian kona-ba HIV/SIDA nia transmisaun no prevensaun sei mínimu tebes, tanba informasaun ne’ebé durante ne’e espalla iha públiku la adekuadu tuir siénsia ne’ebé iha.
Nia sujere pessoal sira ne’ebé asume responsabilidade fó edukasaun no informasaun ba komunidade kona-ba HIV/SIDA tenke treinadu atu fó informasaun ne’ebé korretu, apropriadu tuir siénsia atu sosiedade bele komprende.
Iha parte seluk, Sekretário Ezekutivu Provedoria Direitus Humanu no Justisa (PDHJ), Ambrosio Graciano Soares hateten, ema ne’ebé hasai ema nia privasidade ne’e krime, entaun enkoraja sidadaun sira ne’ebé sente atuoridade sira viola privasidade bele hato’o keixa ba institusaun relevante.
“Keixa espesífiku ba ida-ne’e laiha, maibé keixa balun liga ho tratamentu ladun di’ak no atendimentu públiku tantu husi pessoal saúde no entidade seluk viola ema nia direitu ne’e keixa barak,” nia hateten.
Nia hateten PDHJ nia papél mak promove no proteje sidadaun sira ne’ebé hetan violasaun husi atuoridade públiku, entaun simu keixa no uza kompeténsia halo investigasaun no halo rekomendasaun ba institusaun relevante foti asaun hasoru pessoal ne’ebé komete.