Quinta, Julho 18, 2024

Prezidente Repúblika, José Ramos Horta hateten tinan 20 resin independénsia no la kleur tan Timor-Leste tama ona ba organizasaun ASEAN, governu tenke tau ona orsamentu atu harii ospitál modernu ho kualidade hodi fó atendimentu saúde ba povu.

Prezidente Repúblika, José Ramos Horta hateten tinan 20 resin independénsia no la kleur tan Timor-Leste tama ona ba organizasaun ASEAN, governu tenke tau ona orsamentu atu harii ospitál modernu ho kualidade hodi fó atendimentu saúde ba povu.

Nia rekoñese Hospital Nacional Guido Valadares (HNGV) iha melloramentu di’ak kompara ho tinan 10 liuba kotuk intermus rekursu humanu no ekipamentu avansadu sira.

“Ita haree melloramentu di’ak kompara ho tinan 10 liuba, maibé estadu no governu tenke tau orsamentu bo’ot atu halo ospitál ne’ebé nivel Bali no Singapura, tanba ita nasaun independente, soberanu tinan 20 resin ona no atu tama ASEAN tenke iha ospitál modernu,” nia hateten bainhira halo vizita no fahe prezente natal ba pasiente sira iha HNGV Bidau, Díli.

Presidente fó ezempu progressu ida mak servisu atendimentu ba fase ran nian, ne’ebé uluk pasiente sira refere hotu ba rai-liur. Maibé agora ospitál nasionál iha ona mákina fase ran 14 hodi f’o atendimentu ba pasiente sira.

“Ohin ha’u haree mákina 14 funsiona, ema lubun ida mak fase ran, ne’e problema bo’ot ida iha Timor-Leste,” nia hatutan.

Iha oportunidade ne’e, Prezidente Horta, eziji governu atu rezolve problema falta medikamentu no produtu farmasiutika sira seluk, tanba kleur ona komunidade halerik falta medikamentu iha fasilidade saúde sira.

Entretantu, Espesialista Nefrolojia, médiku Gustavo da Cruz, informa dadaun ne’e pasiente hamutuk nain 103 mak ativu halo tratamentu fase ran rutina iha ospitál nasionál.

“Mákina ita mantein nafatin unidade 14, ne’ebé mákina 13 atende pasiente sira ne’ebé normal no mákina ida koloka espesifiku atende pasiente sira ho moras infesaun hanesan HIV no hepatitis,” nia hateten.

Nia hateten tinan 2023, iha pasiente na’in 62 mak lakon vida, tanba sira sofre moras rins ho komplikasaun ba pulmaun, fuan no orgaun seluk.

Nia hatutan sira mós enfrenta problema reajente atu analiza ran kimia, tanba atu deside tratamentu presiza halo diagnóstika ne’ebé di’ak hanesan analiza ran, urine.

Iha parte seluk, Ministra Saúde, Élia dos Reis Amaral hateten, planu mestre ospitál nasionál iha ona, maibé presiza haree didi’ak planu no dezeñu sira atu harii ospitál ida ne’ebé kualidade di’ak

“Ita sei haree planu estudu viabilidade no dezeñu sira ho didi’ak, tanba ita lakohi harii ospital ida ba tinan ida rua, maibé ospitál ida ne’ebé kaulidade di’ak presiza planu ne’ebé adekuadu,” nia hateten.

Nia hatutan governu tau ona orsamentu atu sosa tan mákina fase ran iha tinan 2024, hodi reforsa kapasidade atendimentu fase ran nian, tanba númeru pasiente barak.

Ministra mós informa aimoruk balun tama ona iha armajen sentral no ekipa halo hela inspesaun molok responde ba pedidu sira husi fasilidade saúde hotu.