Domingo, Abril 21, 2024
Total visitors: 766366

Governu Korea liu husi Embaixada iha Timor-Leste kopera ho governu Timor-Leste hodi ofrese bolsu estudu ba Timor oan sira ne’ebe mak hakarak ba eskola iha nasaun Korea.

Governu Korea liu husi Embaixada iha Timor-Leste kopera ho governu Timor-Leste hodi ofrese bolsu estudu ba Timor oan sira ne’ebe mak hakarak ba eskola iha nasaun Korea.

Embaixador Korea iha Timor-Leste, Shin Man Taek dehan durante ne’e servisu koperasaun entre governu rua ne’e la’o diak tebes tanba ne’e governu Korea fo oportunidade ba Timor oan sira ne’ebe mak iha vontade atu bele ba estudu universidade iha Korea liu husi bolsu estudu ne’ebe mak sira ofrese.

“Ami kopera ona ho universidade balun iha Korea nune’e Timor oan ne’ebe mak intrese ba bolsu estudu ne’e hodi hala’o sira nia estudu iha universidade ne’ebe mak governu Korea identifika no halo ona koperasaun hodi fasilita bolseriu sira aprende iha ne’eba,” nia hatete.

Nia dehan, universidade hirak ne’e mos sei halo kopera ho governu Timor-Leste nune’e bele trasa programa interkambio nune’e mos universidade iha Korea no Universidade iha Timor-Leste mos tenke halo koperasaun nune’e bele loke dalan ba joven sira ne’ebe hakarak eskola iha Korea.

“Programa bolsu estudu ne’ebe ita ofrese ne’e, tanba governu Korea hakarak kuntribui ba dezenvolvimentu humanu iha Timor-Leste,” Embaixador Taek dehan iha Palasio Governu, Dili.

Enkuantu nia dehan, alende sira ofrese bolsa estudu, sira mos deskuti konaba oinsa atu dezenvolve ho setor social seluk ne’ebe kuntribui ba hasa’e moris diak nia bem estar povu nian, hanesan, saude, nutrisaun, no edukasaun.

“Husu ba governu Timor-Leste atu bele apoiu implementa programa sira ne’ebe mak governu Korea realiza iha Timor atu nune’e bele hetan rezultadu ne’ebe diak nune’e bele hametin liu tan servisu kopersaun entre nasaun rua ne’e,” nia husu.

Iha fatin hanesan, Primeiru Ministru Taur Matan Ruak (TMR) hatete durante ne’e governu Timor-Leste ho Korea sempre apoiu malu iha area lubuk ida ne’ebe mak fo benefisiu tebes ba Timor.

“Ita hare hanesan, apoiu kampu de trabalho ba Timor oan sira iha Korea, sira mos apoiu iha area edukasaun, no dadaun ne’e sira ofrese tan bolsu estudu ba Timor oan ne’ebe mak hakarak ba eskola iha Korea,” PM Ruak dehan.