Quinta, Dezembro 08, 2022
Total visitors: 692025

Embaxada Nova-Zelándia iha Timor-Leste apoiu orsamentu ho montante milaun $1.6 ba Ministériu Edukasaun Juventude no Desportu (MEJD) hodi implementa programa Eskola ba Uma iha territóriu tomak.

Embaxada Nova-Zelándia iha Timor-Leste apoiu orsamentu ho montante milaun $1.6 ba Ministériu Edukasaun Juventude no Desportu (MEJD) hodi implementa programa Eskola ba Uma iha territóriu tomak.

Ministru MEJD, Armindo Maia, dehan orsamentu ne’ebé mak Embaxada Nova-Zelándia apoiu ne’e hodi bele aselera lalais implementasaun programa Eskola ba Uma, tanba durante ne’e programa ne’e seidauk implementa ba eskola hotu iha territóriu tomak.

“Ho orsamentu milaun $1.6 ne’ebé mak Nova-Zelándia apoiu ne’e ita sei aslera lalais implementasaun programa eskola ba uma ba eskola hotu iha territóriu laran tomak,” Ministro dehan.

Nia dehan, eskola ne’ebé implementa ona programa eskola ba uma hamutuk 976 iha munisípiu 7, inklui Baucau, Lautem, Liquiçá, Bobonaro, Ermera, Díli no Aileu.

“Hodi orsamentu ne’ebé ita-nia parseiru Nova-Zelándia oferese ne’e ita sei utiliza hodi aselera implementasaun programa eskola ba uma, nune’e bele fasilita estudante sira aprende husi uma,” nia dehan.

Tanba ne’e nia dehan, eskola sira ne’ebé implementa ona programa refere tuir monitorizasaun, ajuda tebes estudante sira hodi aprende iha uma depois halo ezersiusiu iha uma lori ba profesór sira kuriji iha eskola.

Iha parte seluk, Kordenadór Rede Edukasaun Timor-Leste Coalition for Educational (TLCE), José Monteiro, hatete TLCE nafatin apoia programa refere tanba hanesan dalan ida hodi tulun estudante sira kontinua aprende maské eskola feriadu.

“Ita hakarak programa eskola ba uma ne’e implementa ba eskola hotu iha Timor laran, nune’e mós, papel inan-aman mak importante atu enkoraja ka obriga oan sira atu aprende ho maneira foun ne’ebé mak Ministeriu Edukasaun no Juventude no Desportu implementa ne’e,” TLCE Monteiro dehan.

Nia dehan, programa eskola ba uma ne’e, tuir peskiza ne’ebé TLCE iha indika, partisipasaun estudante sira-nian di’ak tebes, tanba meu di’ak tebes hodi fasilita sira estuda iha uma tanba ne’e MEJD tenke servisu hamutuk ho parseiu sira nune’e bele finaliza tiha implementasaun programa eskola ba uma ba eskola hirak ne’ebé mak to’o agora seidauk implementa.