Quinta, Dezembro 08, 2022
Total visitors: 692025

Prezidente Konsellu Administrasaun Eletrisidade Timor-Leste, Empreza Públika (EDTL, EP), Paulo da Silva hateten tinan 2021, sira aloka orsamentu ho montante $500,000 dolar amerikanu hodi sosa sistema dijitál foun Financial Management System (FMS) no Enterprise Resource Planning (ERP) hodi utiliza ba servisu korporativu nian.

Prezidente Konsellu Administrasaun Eletrisidade Timor-Leste, Empreza Públika (EDTL, EP), Paulo da Silva hateten tinan 2021, sira aloka orsamentu ho montante $500,000 dolar amerikanu hodi sosa sistema dijitál foun Financial Management System (FMS) no Enterprise Resource Planning (ERP) hodi utiliza ba servisu korporativu nian.

Nia salienta sistema ne’e integradu bele utiliza halo jestaun ba finansiamentu, liu-liu ezekusaun orsamentu no jestaun rekursu umanu inklui patrimóniu públiku nian.

“Sistema ida ne’e sei ajuda ita kona-ba prosesu tomak ba iha jestaun utilizasaun rekursu finanseira, aleinde ne’e mós ba jestaun patrimóniu empreza nian rasik asset no ba rekursu umanu sira ne’e hotu. Entaun sistema ne’e integradu ne’ebé ita halo,” nia hateten hafoin partisipa iha serimónia lansamentu sistema FMS-ERP iha salaun EDTL, Kaikoli, Díli.

Nia dehan sistema ne’e bele kontribui ba promove transparánsia no mellora prestasaun servisu atendimentu ba públiku lais no efetivu liután.

“Kuandu manuál difikulta ita iha prosesu tomak burokrasia naruk no seluk la transparánsia ne’e problema. Entaun ita presiza iha sistema sira hanesan ne’e para ajuda dudu prosesu tomak para lalais tanba ita-nia alvu ne’e la’ós servisu administrasaun, maibé ita-nia alvu servisu ne’e komunidade, entaun prosesu administrasaun sira ne’e tenke lalais atu ita atinji ita-nia alvu,” nia haktuir.

Nia hateten antes ne’e sira utiliza sistema báziku Microsoft Dynamics 365, maibé tinan 2021, sira loke konkursu públiku ba projetu dezenvolve sistema no kompaña Telemor manan hodi dezenvolve sistema foun FMS-ERP ba EDTL atu jere funsionamentu servisu korporativu nian.

Iha parte seluk, Diretór Kompaña Telemor, Tran Van Bang hateten sira sei kontinua suporta EDTL, EP atu halo manutensaun no asegura kualidade sistema ne’e iha servisu lorloron nian.

“Ami sei kontinua manutensaun no suporta EDTL, EP atu asegura kualidade no estabilidade sistema atu fusnionáriu sira utiliza lorloron,” nia hateten.

Nia dehan sistema ne’e standarte internasionál tanba nasaun kuaze 117 mak utiliza ona sistema ne’e atu kontrola finansiamentu, rekursu umanu no patrimóniu empreza ou institusaun nian.