Sexta, Dezembro 09, 2022
Total visitors: 692386

Prezidente Komité 12 de Novembru, Gregorio Saldanha hateten valór sira joventude rezisténsia hahú lakon ona iha sosiedade, liu-liu valór unidade, korajen, voluntarizmu, badinas tanba sidadaun kontinua tuda malu, oho malu no insulta malu.

Prezidente Komité 12 de Novembru, Gregorio Saldanha hateten valór sira joventude rezisténsia hahú lakon ona iha sosiedade, liu-liu valór unidade, korajen, voluntarizmu, badinas.

Nia dehan triste haree situasaun atuál, ne’ebé loloos iha períodu dezenvolvimentu ne’e sosiedade tenke kaer metin valór sira ne’e hodi atinji objetivu luta ba libertasaun nian mak lori moris di’ak ba povu tomak.

“Realmente ita seidauk halo hanesan uluk sira halo, tanba ne’e mak akontese joven sira tuda malu no oho malu nafatin. La’ós joven de’it ema adultu sira mós tara-aan, joven mate iha sela laran no ema lori osan la tuir regra, ne’e hatudu ema la tuir, la kumpri no nega ona valór sira no lahalo tuir ona sakrifísiu ne’ebé uluk ita-nia asuwain sira halo,” nia hateten bainhira partisipa iha semináriu nasionál iha ámbitu komemorasaun Masakre Santa Cruz 12 de Novembru 1991 ba dala XXXI, ho tema kaer metin valór joventude rezisténsia nian hamutuk ita konstrui nasaun ho esperansa ba futuru, iha salaun CNE Colmera, Díli.

Nia hateten resentemente akontese kazu violénsia, liu-liu joven sira tuda malu iha Akadiru Hun, Lahane no Dare to’o balun lakon vida.

Nia haktuir estadu liuhusi ukun-na’in sira iha responsabilidade bo’ot atu solusiona krime sira ne’ebé akontese iha rai laran tanba violénsia sira ne’e la’ós akontese ba dahuluk, maibé beibeik ona.

Entretantu, Diretór Ezekutivu Centro Nacional Chega! IP., Hugo M. Fernandes husu Komite 12 Novembru tenke kreativu atu introdús valór joventude rezisténsia ba jerasaun foun sira atu bele hatene no sai referénsia ba sira hodi kontinua luta ba moris di’ak povu nian.

“Ha’u hanoin tinan-tinan ita komemora 12 de Novembru, ba CNC ami-nia preokupasaun mak 12 de Novembru ne’e ita só bele komemora tinan-tinan, ba ami ne’e la’ós lalaok ida ne’ebé di’ak. Ita presiza komemora 12 de Novembru liuhusi atividade oioin ne’ebé la’ós de’it to’o 12 Novembru mak ita halo dala ida,” nia hateten.

Iha parte seluk, Joventude Mateus Soares hateten entidade hotu-hotu, liu-liu estadu tenke halo analiza profunda kauza husi akontese violénsia sira iha rai laran.

Nia dehan fatór prinsipál mak instabilidade polítika ne’ebé naruk lori konsekuénsia ba taxa dezempregu aas tanba laiha oportunidade servisu ne’ebé naton ba joven sira.