Governu Foti Suku 5 Hodi Implementa Programa Turismu Komunitaria

Governu liu husi Ministeriu Turismu Komersiu no Industria (MTKI) foti suku 5 hodi implementa programa pilotu Dezemvolvimentu Turismu Komunitaria iha Timor-Leste.

Ministru MTKI, Jose Lucas do Carmo da Silva, hateten suku lima ne'ebe mak goveru hili ona ne'e mak Suku Maubissi, iha Postu Admistrativo Ainaru Vila, Nunimoge no Waimoritula, iha Postu Admistrativu Viqueque Vila, Wailili, iha Postu Admistrativo Baucau, no suku Seloi, iha Postu Admistrativu Aileu.

"Suku lima ne'e ita hili hodi implementa programa turismu komunitaria tanba iha suku hirak ne'e potensia diak tebes hodi dezenvolve turismu komunitaria hodi atrai vizitante nasional no internasional sira bele vizita nune'e mos bele kuntribui reseitas ba estadu," MTKI Carmo hateten.

Nia dehan, implementasaun programa pilotu refere, parte ida hodi empodera komunidade sira no halo suku sai sentru dezenvolvimentu.

"Tanba ne'e husu ba komunidade sira bainhira implementa programa ne'e komunidade sira tenke iha espirito hodi hola parte nune'e bele fo sustentabilidade ba programa pilotu ba dezenvolvimentu turismu komunitaria iha suku laran," nia salienta.

Iha fatin hanesan, Xefe Suku Wailili, iha Postu Admistrativo Baucau, Hernani de Jesus Araujo, hateten hanesan autoridade lokal sente orgulhu tebes tanba governu governu bele hili suku Wailili hodi implementa programa pilotu turismu komunitaria.

"Wailili iha area pontensial ba turismu komunitaria barak hanesan turismu religioso, kultural no turismo rezistensia," nia informa.

Nia dehan, fatin ne'ebe governu hili hodi implementa programa turismu komunitaria iha Wailili mak area Uaisaragi, Laclo, no Neulali no komunidade iha area hirak ne'e hahu halo ona aktividade ho fundu ne'ebe mak iha.

"Fundu ne'ebe mak sira utiliza liu husi kriatividade ne'ebe mak komunidade sira halo hodi atrai vizitante sira bainhira vitiza tenke selu," nia salienta.

Alende ne'e nia dehan, iha Wailili iha mos fatin potensial ba turismu komunitaria ne'ebe tuir planu sei hadia hanesan, gruta religioso Morumutu no Sirimanaman.