Quarta, Setembro 22, 2021

Governu Estado Unidus Amerika (EUA) anunsia fundu adisional ho montante 1 miliaun dolar amerikanu atu haforsa atividade kampanha sensibilizasaun ba komunidade konaba benefisiu vasina atu ema hotu informadu ho konsente simu vasina kontra Covid-19.

Ministra da saúde, Dra. Odete Maria Freitas Belo hateten inisiu mosu surtu Covid-19, governu Amerika apoia hodi harii infrastruktura sira no kontinua servisu hamutuk atu asegura ema hotu simu vasina hodi fo imunidade forte hasoru infesaun Covid-19.

Ministra da saúde, Dra. Odete Maria Freitas Belo hateten inisiu mosu surtu Covid-19, governu Amerika apoia hodi harii infrastruktura sira no kontinua servisu hamutuk atu asegura ema hotu simu vasina hodi fo imunidade forte hasoru infesaun Covid-19.

“Apoia ida ne’e mos la ses husi doasaun vasina ne’ebe sira sei oferese ba ita. Ita seidauk hatene kuantidade vasina hira, maibe sira prontu atu ajuda vasina pfrizer ne’ebe ita atu administra ba labarik sira ho idade tinan 12 ate 17, ne’e maka sira promote hela,” nia hateten hafoin simu apoia husi governu EUA iha salaun Palacio da Sinzas Kaikoli, Dili.

Nia hateten fundus ida ne’e sei utiliza halo kampanha sensibilizasaun ba komunidade, eskola sira konaba vantajen vasina Covid-19, liu-liu AstraZeneca, Sinovac no Pfeizer. No halo mos preparasaun logistika armajenamentu ba vasina pfrizer nian, ne’ebe planu sei to’o mai iha semana ikus fulan Setembru tinan 2021.

Nia hatutan mekanismu sensibilizasaun sei liu husi autoridade lokal sira no profesorres sira atu bele mobiliza komunidade no estudante sira asesu ba informasaun ne’ebe loos konaba vasina.

Entertantu, Enkaregadu Negosiu, iha embaixada Estadu Unidus Amerika Timor-Leste, Tom Daley hateten governu Amerika kontribui ona fundu ho montante 5 miliaun dolar amerikanu ba governu Timor-Leste hodi apoia esforsu governu nian kombate Covid-19.

“Fundu adisional 1 miliaun ne’e atu ajuda oferese informasaun ba ema hira ne’ebe sei iha duvida konaba vasina, entau ida ne’e ajuda hato’o informasaun ne’ebe loos atu konvense ema simu vasina tanba estudu sientifiku hatudu vasina bele ajuda redus kazu severidade husi Covid-19,” nia hateten.

Nia hateten kobertura vasinasaun Covid-19 iha Timor-Leste hatudu progressu ne’ebe diak tebes kompara ho nasaun seluk, maibe importante tenke halo esforsu atu ema hotu bele simu vasina.

Nia hatutan governu Amerika aloka ona fundu 4 bilhoens ba sistema Covax Facility atu fornese vasina Pfrizer, Moderna ba nasaun sira iha mundu inklui Timor-Leste, ne’ebe tempu badak vasina Pfrizer sei to’o mai hodi administra ba labarik sira ho idade tinan 12 ate 17.

Iha parte seluk, Diretor Executivu Forum NGO Timor-Leste (FONGTIL), Daniel Santos do Carmo hateten rezultado monitorizasaun hatudu iha ona koperasaun ne’ebe diak entre pesoal saúde no autoridade lokal sira hodi sensibiliza komunidade sira kona ba vasina.

“Ita sujere ministerio da saúde presiza kolabora ho igreja atu husu igreja nia apoia halo sensibilizasaun ba komunidade sira, liu husi atividade igreja atu enkoraja komunidade sira partisipa iha vasinasaun,” nia hateten.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04