Domingo, Junho 20, 2021
Total visitors: 566016

Porta Voz Komisaun Interministerial Vasinasaun Covid-19, iha Timor-Leste, Doutora Danina Coelho hateten governu deside introdus tan vasina kontra Covid-19 Sinovac atu reforsa vasina AstraZeneca hasa’e kobertura vasinasaun iha rai laran hodi fo imunidade ba sidadaun sira bele proteje aan husi infesaun virus Covid-19.

Porta Voz Komisaun Interministerial Vasinasaun Covid-19, iha Timor-Leste, Doutora Danina Coelho hateten governu deside introdus tan vasina kontra Covid-19 Sinovac atu reforsa vasina AstraZeneca hasa’e kobertura vasinasaun iha rai laran.

Nia dehan vasina Sinovac produsaun China ne’e, iha loron 1 fulan Junho hetan ona aprovasaun husi Organizasaun Mundial Saúde (OMS) tama iha lista vasina ne’ebe autoriza uza iha emergensia.

“Vasina Sinovac, maske OMS foin aprova tama iha lista, maibe vasina ne’e uza ona ba ema miliaun iha nasaun Indonesia, Brazil, Turkia, Chili, Filipina, Malaysia. Timor, ita husu no governu China oferese vasina ne’e mai ita. No sira husu atu fo prioridade ba sira nia komunidade sira ne’ebe hela iha ne’e tanba ne’e ita hatama iha lista prioridade,” nia hateten liu husi konferensia imprensa iha salaun Ministerio Solidaridade Sosial Inkuzaun Kaikoli, Dili.

Nia dehan estudu sientista sira katak ema ne’ebe simu ona vasina Sinovac kompletu doze daruak efektividade 78% proteje husi infesaun virus COVID-19, no 100% evita hospitalizasaun.

Nia hatutan implementasaun vasina Sinovac faze primeru sei hahu ho 100,000 doze, ne’ebe sei kobre ema hamutuk 50,000.

Nia informa Timor-Leste simu ona apoia vasina AstraZeneca ho kuantidade 24,000 doze husi Covax facility, no 70,000 doze husi governu Australia. No sei simu tan 100,800 doze husi Covax Facility iha semana oin ba dose daruak nian no doze dahuluk. No simu mos vasina Sinovac husi governu China ho kuantidade 100,000 doze.

Tuir dadus komulativu vasinasaun Covid-19 iha Timor-Leste, hatudu hahu loron 7 fulan Abril to’o loron 3 fulan Junho tinan 2021, sidadaun idade tinan 18 ba leten nain 87,230 kompostu husi 74,659 iha munisipio Dili no nain 12,000 resin husi munisipio seluk maka simu ona vasina AstraZeneca doze dahuluk.

Husi total 87,230 ne’e nain 1 maka relata hetan reasaun adverse grave tanba alergia no nain 27 mosu reasaun adversa kaman hanesan isin manas, ulun moras no seluk tan.

Entretantu, Vice Presidente Parlamentu Nasional, Deputado Luis Roberto husu governu atu dezenvolve mekanismu servisu ida ne’ebe diak ho autoridade lokal sira hodi hasa’e partisipasaun komunidade nian ba kampanha vasinasaun Covid-19 tanba vasina uniku asaun atu kombate surtu Covid-19.

“Komunidade nia partisipasaun minimu tebes, liu-liu ita nia inan aman sira ne’ebe idade tinan 60 ba leten, tanba ne’e governu tenke muda mekanismu atu partisipasaun ne’e bele maioria,” nia hateten.

Nia fo ezemplu iha munisipio Dili, ne’ebe taxa insidensia Covid-19 a’as, maibe vasinasaun sei menus tanba ne’e presiza hare fali medida sira atu fo fleksibilidade ba sidadaun sira partisipa maximu iha kampanha vasinasaun.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04