Komunidade Tauk Ba Konsulta Iha Fasilidade Saúde

Xefe Suku Soba, Postu Administrativu Laga Munisipio Baucau, Francisca Monica hateten durante aplikasaun serka sanitaria, komunidade sira tauk ba konsulta iha fasilidade saúde sira tanba menus informasaun kona ba surtu Covid-19, ne’ebe afeta hela sosiedade iha rai laran.

Nia salienta komunidade tauk tanba hanoin ba fasilidade saúde tenke halo swab teste, no wainhira swab positivu Covid-19 ona. Entau sira moras kaman hela deit iha uma.

“Ita hare agora komunidade sira ne’ebe ba fasilidade saúde maka inan isin rua no bebe sira ne’ebe atu hetan vasina. Komunidade baibain ita hare menus, menus la signifika sira la moras, maibe sira tauk,” nia hateten via telephone.

Nia dehan iha fulan Abril liu ba, sosiedade sivil balun halo sensibilizasaun ba komunidade sira kona ba surtu Covid-19 no lalaok servisu atendimentu sira atu konvense komunidade sira labele tauk ba konsulta iha fasilidade saúde no kontribui ba prevensaun surtu Covid-19.

Entretantu, Diretur Ezecutivu FONGTIL, Daniel Santos do Carmo hateten sira nia papel maka fo edukasaun no sensibilizasaun ba komunidade sira kona ba ezistensia surtu Covid-19 no moras seluk, maibe presiza tempu atu konvense ema hotu hodi kumpri medida preventive sira hanesan uza maskara, fase liman beibeik, mantein distansia fisiku, distansia social.

“Surtu ne’e idade tinan ida fulan rua, ita ema ne’e iha konesementu no kapasidade ne’ebe lahanesan. Entau sira labele adapta no kumpri lalais tanba ne’e ita hotu nia papel atu konsensializa sira no ajuda sira komprende,” nia hateten.

Nia dehan sira nia monitorizasaun iha baze hare komunidade tauk duni ba konsulta iha fasilidade saúde, no sira halai ba hotu ailaran, wainhira ekipa saúde atu halo swab teste.

Iha parte seluk, Diretur Ezecutivu Servisu Autonom Medikamentu no Ekipamentu Saúde (SAMES), Santana Martins hateten sira nia observasaun hare katak atendimentu iha fasilidade saúde sira ladun lao ho diak tanba fasilidade sira la halo pedidu ba medikamentu hanesan iha situasaun normal.

“Preokupasaun ne’ebe ami sente agora maka konsumu ba iha medikamentu, liu-liu aimoruk sira ladun movimentu. No ami koko halo komunikasaun ho fasilidade saúde sira, maibe informasaun ne’ebe ami simu katak ho isu Covid-19 ema tauk ba halo tratamentu,” nia hateten

Nia dehan sira preokupa tanba movimentu aimoruk menus sei kontribui ba kuantidade aimoruk expair aas.