Domingo, Maio 16, 2021

Xefe do Suco Kaikoli, Hipolito Marques hateten familia 1,116 ne’ebe afetado makas husi inundasaun iha suku Kaikoli, iha munisipiu kapital Dili, seidauk hetan apoia emergensia ruma husi governu.

Xefe do Suco Kaikoli, Hipolito Marques hateten familia 1,116 ne’ebe afetado makas husi inundasaun iha suku Kaikoli, iha munisipiu kapital Dili, seidauk hetan apoia emergensia ruma husi governu.

Nia dehan autoridade lokal sira rekolha ona dadus komunidade sira nian kona ba estragus no submete ona ba governu, maibe seidauk hetan apoia tantu ajuda emergensia ka nesesidade bazika.

“Kaikoli tinan-tinan hetan inundasaun, maibe foin dadaun loron 4 fulan Abril ne’e Dili laran tomak. Kaikoli maioria afetado kuaze 1,116 xefe familia ne’ebe sasan uma laran hetan estragus totalmente, maibe to’o agora sira seidauk hetan apoia emergensia ruma,” nia hateten via telefone.

Nia dehan komunidade ida-ida halo esforsu atu sosa fali sasan sira uma laran nian hanesan kulsaun toba, sasan dapur nian atu bele uza ba lorloron nian.

Nia hateten sasan sira bo’ot ne’e bele aguenta, maibe nesesidade bazika ne’e importante tenke urgente atu ema bele konsumu tanba fulan ida ona seidauk iha apoia ruma.

“Ami tun ba komunidade sira foti dadus lori governu nian naran, entau ema mai husu ami, ami tenke husu tutan ba governu, maibe to’o agora seidauk ami hein hela,” nia hateten.

Nia hatutan iha individu balun ne’ebe fo apoia aihan ba uma kain ida rua hodi responde ba sira nia nesesidade iha loron balun.

Iha parte seluk, Diretur Organizasaun Saúde Ba Ema Hotu (SABEH), André Belo hateten sira servisu hamutuk ho entidade balun hodi fornese dadus atu bele mobiliza apoia ba komunidade sira ne’ebe afetado tanba ema barak maka presiza tulun.

“Apoia sasan nesesidade bazika ba komunidade ne’ebe presiza, entau sasan ne’ebe ami fahe maka foos, mina, trigu, biti, manta, maskuteiru, ruopa no kulsaun atu sira labele toba iha rai tanba sasan sira kuaze estragadu hotu,” nia hateten.

Nia dehan situasaun surtu Covid-19 ho aplikasaun estado emergensia durante tinan ida no akontese tan kalamilidade ne’e halo ema sai vulneravel liu tan tanba sira nia sasan kuaze estraga hotu.

Nia hateten sira nia apoia bazeia ba lista ne’ebe sira hetan husi organizasaun komunitaria sira no autoridade lokal sira tanba ne’e lista ne’ebe sira hetan laos iha munisipiu Dili deit, maibe munisipiu sira seluk mos hanesan Manatutu, Baucau, Aileu no seluk tan.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04