- Publika iha: 28 Abril 2021
Diretor Executivu Organizasaun Saúde Ba Ema Hotu (SABEH), Doutor André Belo hateten governu tenke hasai lista aihan no sasan ne’ebe bele apoia ba komunidade sira iha situasaun emergensia tanba durante akontese kalamalidade ne’e apoia aihan barak la saúdavel.
Nia salienta labarik barak iha sentru evakasuan sofre moras diareia, malnutrisaun no moras infesaun seluk tanba sira hetan apoia aihan ne’ebe la saúdavel, liu-liu hahan plastiku sira hanesan susuben formula no supermi. No kondisaun ambiente ne’ebe la ijiene kontribui makas ba labarik sira atu sofre moras.
“Tuir lolos ministerio da saúde, sekretario estado protesaun sivil no organizasaun mundial saúde atu define sasan saida maka ita bele apoia, ne’ebe ita bolu doasaun matenek. Ne’e signifika ita hili hahan ne’ebe saúdavel no diak ba ita nia komunidade sira.
Ami uluk kedas la fahe susubeen formula tanba ladiak, aihan balun ita distribui liu ona hanesan supermi, ita mos iha dever moral atu fo edukasaun katak hahan ne’e ba ema bo’ot deit no labele fo ba labarik sira. Ho nune’e ita bele ajuda no ikus mai ita labele kria fali problema iha komunidade nia leet iha situasaun surtu ne’ebe makas asesu ba tratamentu saúde mos difisil oituan,” nia hateten iha servisu fatin Compound UN Kaikoli, Dili.
Nia dehan governu tenke iha ona lista doasaun iha situasaun emergensia tanba dezastre naturais ne’e kualker tempu bele akontese atu doasaun sira ne’e labele kria fali dezastre bo’ot ba saúde publika komunidade sira nian.
“Ami tratamentu saúde iha centru Cristal, labarik nain 42 maka tama kategoria malnutrisaun tanba lorloron sira konsumu supermi, chico no seluk tan. Wainhira ita husu sira dehan aihan sira ne’e hetan doasaun,” nia dehan.
Nia konsiente problema moras diareia no malnutrisaun laos kauza principal mai husi produtu aihan sira ne’ebe sira konsumu husi doasaun deit, maibe kontribui mos husi kondisaun bee no saneamentu ne’ebe la diak, laiha ijiene.
Nia informa sira iha atividade principal rua atu apoia komunidade afetado husi inundasaun ne’ebe akontese iha loron 4 fulan Abril tinan 2021. Atividade sira henesan atendimentu saúde gratuita no apoia umanitaria hanesan foos, mina, trigu, biti, manta, muskiteiru, roupa no seluk tan.
Iha parte seluk Ministra da Saúde, Doutora Odete Maria Freitas Belo hateten politika governu nian katak bebe ne’ebe foin moris to’o fulan nen fo deit inan nia susuben, maibe depois fulan nen bele fo mos aihan adisionan seluk tanba ne’e iha situasaun kalamidade ne’e enkoraja inan sira atu kontinua fo susuben ba oan sira.
Nia dehan iha kondisaun balun ne’ebe obrigado fo susuben formula ba bebe sira, maibe iha situasaun kalamidade ne’e kondisaun ijiene ne’ebe ladiak perigu ba labarik sira nia saúde.
“Ho situasaun ida agora inundasaun, bee mos laiha entaun perigu tebes tanba wainhira fo susuben formula tenke tau iha bibron, kaneka no presiza bee moos atu fase sasan sira ne’e. Entaun labarik barak hetan moras diarea laos tanba susuben, maibe bibiron maka la moos, liman la moos,” nia hateten.
Nia dehan labarik sira sofre moras diarea moderadu no grave bele kauza ba mortalidade, no bele mos monu ba kondisaun malnutrisaun tanba ne’e importante atu kuidadu ho preparasaun aihan sira ba oan sira.