Presidente Cruz Vermelha de Timor-Leste (CVTL), Madalena Hanjan hateten familia sira iha centru evakuasaun sira barak maka fila ona ba sira nia hela fatin, maibe sira hotu enfrenta insufisiente aihan hodi sustenta moris tanba wainhira akontese inundasaun sira nia sasan hotu inklui aihan bee lori no estraga hotu iha.

Presidente Cruz Vermelha de Timor-Leste (CVTL), Madalena Hanjan hateten familia sira iha centru evakuasaun sira barak maka fila ona ba sira nia hela fatin.

Nia salienta iha sentru evakuasaun CVTL, hela deit ona familia 10 resin tanba sira nia uma hetan estragus total, maibe kauze familia 70 resin fila hotu ona ba sira nia hela fatin.

“Ami nian iha ne’e hela deit familia 10 resin. Foun-foun familia 80 resin, agora ema ida-ida fila ona ba sira nia uma tanba bee maran ona, maibe alimentasaun no oinsa sira bele rekupera fali tanba sira nia uma iha, maibe sira laiha sasan no hahan. Dadaun ne’e sira simu aihan oituan-oituan hodi aguenta ba loron ida rua deit atu sustenta sira nia moris loron tomak nian ne’e kompetensia governu nian tanba n’ee familia falun telephone mai ami no ami husu sira atu informa ba xefe aldeia sira, ita labele fo hahan ba uam kain ida-ida ne’e difisil mos atu kontrola,” nia hateten via telephone.

Nia dehan sira halao ona enkontru ho governu, liu-liu ministerio kompetente sira atu bele halo atuasaun lalais hodi responde ba nesesidade sidadaun sira nian. No sira mos hare hela situasaun kritiku ruma sira sei hare solusaun ne’ebe mais lalais atu ajuda komunidade sira.

Nia hateten CVTL iha ligasaun ho Cruz Vermelha iha nasaun oioin tanba ne’e kontinua simu apoia umanitaria atu ajuda povu no apoia situasaun ne’ebe governu mos hasoru hela dificuldade.

Nia informa apoia umanitaria ne’ebe CVTL halibur husi cruz veremelha internasional no individu sira balun osan hamutuk ona $500,000 atu ajuda povu no fasilita voluntario sira halao servisu sira iha situasaun agora.

Sira presiza duni roupa, aihan ba inan isin rua sira no labarik sira. Hahna ne’ebe sira fahe inan no labarik sira konsumu. Hahan ba labarik sira maka ami iha preokupasaun oituan.

Iha parte seluk, Ministra da Saúde, doutora Odete Maria Freitas Belo hateten familia barak lakon hela fatin no sasan, maibe husi parte saúde sira hare no asegura hela stok medikamentu sira atu responde ba saúde publika kauza husi inundasaun, ne’ebe akontese iha loron 4 fulan Abril tinan 2021.

Nia dehan moras ne’ebe rejistu makas iha fasilidade saúde sira maka moras diareia, isin katar no malnutrisaun tanba bee moos hetan ona kontaminasaun.

“Ami hare hela aimoruk oralit ita iha sufisiente hela atu hatan ba kazu surtu diareia nian. No ita mos komunika ho parseiru sira atu bele hare aihan sira ne’ebe fo ba familia sira laos foos deit, modo tahan, fore sira ne’ebe kontein proteina atu bele ajuda labarik sira tinan liam mai kraik, inan isin rua no inan fo susu sira,” nia hateten.

Nia dehan sira nafatin halo advokasia ba ministeri kompetente sira atu atensaun mos ba aihan sira ne’ebe distribui ba familia sira konsumu.