- Publika iha: 17 Fevereiro 2021
Governo liu husi Reuniaun Konselhu Ministros deside hodi hapara total movimentu ba area fronteriza inklui munisipio Covalima no Bobonaru, tanba kazu sira ne’ebe detekta pozitivo ba coronavirus (COVID-19) mai husi movimento ilegal sira.
“Movimentu ba area fronteriza ne’e ita hapara tanba ita hare ba kazu pozitivo Covid-19 ne’e mai husi movimentu ilegal no ita deside hapara atu nune’e la bele mosu transmisaun lokal iha teritoriu nasional,” Ministro Prezidensia Konseilu Ministro, Fidelis Manuel Leite Magalhaes hateten.
Nia dehan, husi rezolusaun refere, hapara movimentu tama sai husi munisipiu Covalima no Bobonaro mai Dili nune’e mos ba munisipiu seluk, autoriza movimentu ba sira ne’ebe mak presija importante no sosa ai-han, seluk husi ne’e la autoriza movimentu.
“Rezolusaun ne’e ita hahu aplika ona remata depende ba situasaun atual iha munisipiu rua ne’e la’o normal, maibe kazu pozitivo Covid-19 kuntinua aumenta, kuntinua hapara movimentu,” nia dehan.
Tanba ne’e husu ba populasaun iha munisipiu Covalima ho Bobonaro atu la bele fasilita malu movimentu ilegal, maibe tau matan ba malu fo hanoin ba malu atu bele apoio governo halo prevensaun ba transmisaun Covid-19.
Iha parte seluk, Peskijador Fundasaun Mahein (FM), Sancio Xavier hateten, Timoroan sira ne’ebe hela iha Indonesia sira nia vida amiasa tebes tanba ne’e sira hakarak mai salva moris iha Timor-Leste, mai fronteira taka sira tenke husi movimentu ilegal, no governu tenke simu no proteze sira tuir konstituisaun RDTL.
“Iha ita nia lei la bandu sidadaun nasional atu fila mai nia rai rasik no governu iha dever atu proteje nia sidadaun la’os taka dalan ba nia sidadaun rasik,” Peskizador FM Xavier hateten.
Nia dehan, situasaun ida dadaun ne’e akontese governu la merese atu minimiza liberdade sidadaun nian, maibe governu tenke iha politika ne’ebe diak no hadia kondisaun hodi proteje Timoroan sira ne’ebe mak halo movimentu ilegal mai Timor-Leste hodi salva vida.