INFORDEPE Fo Formasaun Espesifiku Ba Professor Kontratado Nain 300

Instituto Nasional Formasaun das Dosente Profesional da Edukasaun (INFORDEPE) fo formasaun espesifiku ba professores kontratado hamutuk nain 00 hodi prepara ba rekrutamento ba professores permanente nune’e labele duvida ho sira nia kapasidade.

Vise Prezidente INFORDEPE, Arlindo Pinto hateten, professor kontratado nain 300 durante ne’e hanorin iha eskola komposto husi Pre-Eskolar to’o Ensino Baziku sira iha rai laran.

“Ita nia governo iha plano fixu ona hodi rekruta tan professor kontratado hamutuk nain 900 ba permanente, tanba ne’e ita inklui uluk professor hirak ne’e iha formasaun hodi hadia liu tan sira nia profesionalismo iha area hanorin nian,” Vise Prezidente INFORDEPE Pinto dehan.

Tanba ne’e nia dehan, dadaun ne’e inklui uluk professor kontratado hamutuk nain 300 iha formasaun espesifiku ne’e hodi haklean liu tan sira nia abilidade no vontade transforma siensia ida ne’ebe mak diak liu ba estudante sira.

“INFORDEPE apoio uluk formasaun ba professores nain 300 ne’e depois iha etapa tuir mai bolun tan sira seluk,” nia informa.

Tanba ne’e nia dehan, formasaun ne’e espesiku tuir area ida-idak nian iha Pre-Eskolar no Ensino Baziku nian ho prepara uluk konhesimento bainhira rekruta ba professor permanente ne’e mos la iha duvida ba sira nia kapasidade.

Iha parte seluk, Rede Edukasaun Timor-Leste Coalition for Education (TLCE) hatete formasaun ne’ebe mak INFORDEPE halo ba professor kontratado sira hodi prepara ba prekrutamento inisiativa ne’e pozitivu tebes no kontribui ba dezenvolvimento edukasaun.

“Atu halo rekrutamento ba professor permanente tenke dezenvolve hadiak diak liu tan sira nia konhesimento hodi eduka ita nia oan estudante sira,” TLCE Monteiro hateten.

Nia dehan, formasaun sira hotu tenke ba area hotu hanesan plano jestaun eskolar, lingua, plano sala de aula, no utilizasaun komputador atu nune’e bele hadia dezenvolvimento kualidade iha area edukasaun.

“Ita husu mos bainhira formasaun sira ne’e finaliza ona, tenke iha mos monitorizasaun hodi hare mudansa abilidade professor sira ne’e oinsa diak ona ka seidauk nune’e hodi hatene tuir,” nia dehan.

Tanba ne’e nia dehan, bainhira halo deit formasaun la iha peskija ka monitorizasaun ruma hanesan deit tanba, la hatudu dados fixu konaba konhesimento professor sira nian husi formasaun tanba ne’e peskija importante.