Presidente Konselhu Administrasaun Eletrisidade Timor-Leste Empreza Publika (EDTL, E.P.), Paulo da Silva informa 76 sukus husi 452 sukus iha teritorio tomak mak seidauk iha asesu ba eletrisidade tanba ne’e sei fo mos prioridade halo instalasaun ba suku balun.

Presidente Konselhu Administrasaun Eletrisidade Timor-Leste Empreza Publika (EDTL, E.P.), Paulo da Silva informa 76 sukus husi 452 sukus iha teritorio tomak mak seidauk iha asesu ba eletrisidade.

Nia dehan eletrisidade importante ba komunidade sira atu bele halao atividade negosio ki’ik sira hodi kontribui ba hadia ekonomia familia no nasaun nian.

“Tuir hau hatene 76 sukus mak seidauk iha asesu ba eletrisidade, maibe tinan ne’e ita iha ona planu atu kobre metade tanba ne’e alende servisu manutensaun ba sistema distribuisaun halo mos servisu eletrifikasaun ba suku sira ne’ebe seidauk iha asesu ba eletrisidade,” nia hateten iha Hotel Novu Turismo Lecidere, Dili.

Nia dehan maioria populasaun iha ona asesu ba eletrisidade durante 24 oras, maibe barak mak sei gratuita tanba seidauk monta kontador eletrisidade foun atu bele ense pulsa no kontribui ba taxa.

Nia hatutan, sira nia prioridade ida mak hasa’e taxa ba eletrisidade nian liu husi monta kontador atu ema hotu ne’ebe iha asesu ba eletrisidade 24 oras obrigatorio tenke selu tanba kustu operasional no mina ba eletrisidade bo’ot tebes.

Nia haktuir, kapasidade komunidade nian atu selu ne’e desizaun governu nian, maibe sira hanesan empreza nia prinsipiu mak hasai $1 tenke iha retornu.

Nia informa, sira sei buka maneira alternativa seluk husi seguimentu produsaun nian atu bele kontribui ba redus kustu tanba kustu operasaun ki’ik sei implika ba kustu eletrisidade atu komunidade sira bele iha kapasidade kontribui.

Iha parte seluk, Membru Parlamentu Nasional, Deputada Maria Angelica Rangel hateten tinan 20 indepedensia, maibe povu sei hasoru problema sosial barak hanesan laiha asesu ba bee moos, eletrisidade no estrada.

Nia fo ezemplu, iha postu administrativu Laklubar munisipio Manatutu ne’ebe giografikamente besik iha kapital Dili, suku balun seidauk iha asesu ba bee moos, eletrisidade, no estrada.

“Aldeia Baharedok suku Barata tinan 20 ona ita ukun aan, maibe sira seidauk hetan asesu ba eletrisidade no estrada,” nia hateten.

Nia dehan governu tenke fo mos prioridade atu dezenvolve area rural sira atu povu sira iha ne’eba bele sente independensia no kontribui atu haburas no dezenvolve nasaun ida ne’e.