- Publika iha: 03 Setembro 2011
Hafoin halo revizaun ba programa analfabetizasaun ne’ebe hala’o iha distritu 13 nia laran, Ministeriu Edukasaun (ME) liu husi Departementu Edukasaun Manajementu Sistema Informasaun (EMIS) identifika distritu 4 mak livre ona husi analfabetu.
“Distritu 4 ne’e mak ; distritu Oe-Cusse, Manatuto, Manufahi no Distritu Lautem e ba oin distritu ne’ebe sei livre tan husi analfatu mak Distritu Dili sub-distritu Atauro,”informa Xefe Departementu EMIS, Rosa Soares, semana kotuk iha enkontru loron rua ho koordenador distritu programa analfabetizasaun hodi halo revizaun ba dadus analfabetismu 2011 nian, iha Salaun Enkontru ME, Vila-verde,Dili.
Tuir Rosa, enkontru ne’e importante atu hatene tuir dezafiu saida mak durante ne’e sira infrenta iha distritu 13 nia laran.
“Programa ekivalensia hanesan pasu ida hakat ba oin tanba programa analfabetizasaun ne’e hala’o ona iha distritu 13,”nia dehan. “Programa analfatizasaun importante, nune’ebele hamenus beik iha rai laran,”.
Ekipa rekollamentu de dadus iha distritu 13, kada fulan tolu to’o tinan ida hatama sira nia relatoriu mai iha EMIS nune’e bele halo revizaun fila-fali.
Entretantu tuir Kordenador Programa Analfabetizasaun husi Sub-distritu Manatuto, Manuel Soares, enkontru revizaun ba programa analfabetizmu ne’e importante “ oinsa atu it abele hatene diak liu tan kona-ba rekollamentu de dadus analfabetu sira,” nia dehan.
Tanba ne’e nia parte husu ba ME oinsa at fo treinamentu ba sira ho diak liu tan nune’e sir abele hala’o programa ne’e ho susesu.
“Dadus sira ne’ebe ami rekolla tiha, ami hatama ba Departamentu Edukasaun Manajementu Sistema Informasaun (EMIS) atu tau iha data base, nune’e ita bele hatene ema na’in hira mak partisipa ona edukasaun non formal ne’e,” nia hateten.