- Publika iha: 03 Setembro 2011
Relasiona ho prosesu ke’e mate ruin ba vitima 12 Novembru nian ne’ebé oras ne’e sei paradu maibé Komite 12 de Novembru kontinua buka informasaun kona-ba sira nia paradeiru.
“Ami agora sei buka hela informasaun hodi identifika mate ruin sira ne’e iha fatin iha ne’ebé mak atu ke’e tan,” hateten Kordenador Komite 12 Novembru,Gregorio Saldanha semana kotuk iha nia knar fatin, Balide,Dili.
Tuir nia, komite servisu hamutuk ho ekipa forensic internasionál, husi Polisia Nasionál Timor-leste (PNTL) no ekipa forensic husi óspital nian.
Entretantu tuir Deputadu Domingos da Costa, katak parlamentu aprova ona orsamentu ba 12 novembru nian inklui ho antigun kombatentes no klandestin sira.
“Orsamentu ha’u la lahatene klaru tanba kleur tiha ona maibé osan barak duni hodi hare ba antigu kombatentes nian, konaba veteranus nian, klandestina nian,nomós ba 12 Novembru nian,”Domingos informa.
Entretantu familia vitima 12 Novembru, Bonifacio Marques hateten ninia maun to’o agora seidauk simu nia direitu husi Governu.
“Ha’u nia maun Fernando Freitas mós vitima ba 12 de Novembru ne’e maibé ate agora ha’u nia maun rasik seidauk simu ninia osan,’’Bonifacio informa.Bonifacio hatutan, nia maun Fernando Freitas hakerek tiha ona naran maibé ate agora Governu seidauk fo sira nia osan.