Quarta, Novembro 25, 2020
Total visitors: 536834

Diretor Nasional Servisu Apoia Hospitalar no Emergensia, iha Ministerio da Saúde, Doutor Nilton da Silva hateten sosiedade Timor sei menus koñesementu kona ba konsekuensia poluisaun anin (ar) ba saúde publika tanba maioria sei utiliza energia solidu ka ai maran hodi tein.

Diretor Nasional Servisu Apoia Hospitalar no Emergensia, iha Ministerio da Saúde, Doutor Nilton da Silva hateten sosiedade Timor sei menus koñesementu kona ba konsekuensia poluisaun anin (ar) ba saúde publika tanba maioria sei utiliza energia solidu ka ai maran hodi tein.

Nia dehan, impaktu poluisaun anin ba saúde publika bo’ot tebes no durante ne’e dadus estatistika hatudu moras sira ne’ebe akontese tanba polusaun anin registu makas iha fasilidade saúde sira hanesan moras infesaun respiratorio aguda, maibe ema hotu la preokupa.

“Ohin loron ita tur hamutuk ho organizasaun naun-governmental no linha ministerio relevante sira hodi hanoin hamutuk atu bele kria formatu ruma hodi hasa’e koñesementu no konsiensia publiku nian kona ba risku poluisaun ar,” nia hateten bainhira halo abertura ba workshop ho tema opportunities for transition to clean household energy in TL iha Hotel Novu Turismo, Dili.

Nia dehan, poluisaun ar konsidera hanesan risku bo’ot ba saúde ambiental iha mundu tanba kuaze ema billiaun 3 uza material sunu inefisiente no barak liu husi nasaun sira ho rendimentu ekonomiku baixa no mediu tanba sei depende makas ba material kombostivel solidu, ne’ebe rezulta polusaun makas baihira uza ba tein.

Nia informa, tuir dadus Survey Demografiku no Saúde tinan 2016, hatudu uma kain 86% iha Timor-Leste uza kombostivel solidu, kompostu barak liu husi ai-sunu hodi tein. Husi dadus ne’e iha area rural kuaze 95% uma kain uza ai-sunu tein no iha area urbanu 59%.

Alende ne’e nia dehan, espozisaun ba sigaru suar konsidera a’as no husi 51% uma kain, ema ida fuma iha uma laran lorloron.

Nia hatutan, kondisaun sira ne’e kontribui makas ba hamosu moras infesaun respiratorio aguda iha rai laran, ne’ebe alvu risku maka labarik tinan lima mai kraik tanba dadus nasional hatudu iha fulan Junho tinan 2020, moras infesaun respiratorio aguda registu hamutuk 330,854 kazu no moras pneumonia iha 12,632.

Iha parte seluk, Reprejentante Organizasaun Mundial Saúde Interinu, Doutor Dongbao Yu hateten sira prontu atu servisu hamutuk ho governu, liu-liu fo apoia ba ministerio da saúde atu promove energia moos iha uma laran, liu husi halo sensibilizasaun ba publiku kona ba impaktu polusaun ar ba saúde publika.

“Ami espera bele dezenvolve formatu asesmentu ida hodi hatene situasaun baziku konaba utilizasaun energia hodi hetan informasaun ne’ebe klean atu bele halo diskusaun diak ho governu kona ba energia moos no nia impaktu sira ba nasaun,” nia hateten.

Nia dehan, bazeia ba dadus peskiza ne’ebe iha hatudu Timor-Leste iha risku bo’ot tebes ba poluasaun ar tanba populasaun sei utiliza kombostivel solidu, liu-liu ai-sunu hodi tein no halo atividade seluk iha uma.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04